Poł Mak-Kartni zapisaŭ «apošniuju pieśniu Bitłz». Pryčym zrabiŭ heta z dapamohaj štučnaha intelektu
Jak patłumačyŭ muzyka, technałohija vykarystoŭvałasia dla «zdabyvańnia» hołasa Džona Lenana (šlacham jaho izalacyi ad astatniaha hukašeraha) sa staroha demazapisu, paśla čaho jamu ŭdałosia zaviaršyć stvareńnie pieśni.
14.06.2023 / 07:26
Poł Mak-Kartni. Fota: Scott Garfitt/Invision/AP
Ser Poł Mak-Kartni raskazaŭ, što jamu ŭdałosia z dapamohaj štučnaha intelektu stvaryć «apošniuju pieśniu Bitłz».
Jak patłumačyŭ muzyka ŭ intervju radyjoprahramie Bi-bi-si Today, technałohija vykarystoŭvałasia dla «zdabyvańnia» hołasu Džona Lenana (šlacham jaho izalacyi ad astatniaha hukašeraha) sa staroha demazapisu, paśla čaho jamu ŭdałosia zaviaršyć stvareńnie pieśni.
«My tolki što skončyli jaje, jana budzie vypuščanaja ŭ hetym hodzie», — dadaŭ Mak-Kartni.
Jon nie skazaŭ, što heta za pieśnia, ale, chutčej za ŭsio, havorka idzie pra kampazicyju Lenana 1978 hoda pad nazvaj Now And Then («Tady i ciapier»).
Jana ŭžo była pretendentam na «pieśniu ŭźjadnańnia» čaćviorki ŭ 1995 hodzie, kali «bitły» pieraźviali pieśni dla zbornika Anthology («Antałohija»), jaki achoplivaje ŭsiu ich karjeru.
Mak-Kartni atrymaŭ demazapis ad udavy Lenana Joka Ona za hod da taho, jak jon, Charysan i Rynha Star pačali pracavać nad «Antałohijaj».
Heta była adna ź niekalkich piesień na kasiecie z nadpisam «Dla Poła» (For Paul), jakuju Lenan zapisaŭ niezadoŭha da svajoj hibieli ŭ 1980 hodzie.
Hetyja pieśni-nakidy byli ŭ asnoŭnym zapisanyja na «bumboks» (vialiki kasietnik), kali Lenan muzicyravaŭ na pijanina ŭ svajoj ńju-jorkskaj kvatery.
Paśla zapisanyja z dapamohaj pradziusara Džefa Lina dźvie z hetych piesień — Free As a Bird («Svabodny, jak ptuška») i Real Love («Sapraŭdnaje kachańnie») — byli vypuščanyja ŭ 1995 i 1996 hadach i stali pieršym «novym» materyjałam «Bitłz» za 25 hadoŭ.
Hurt taksama pasprabavaŭ zapisać i Now And Then, pieśniu pra kachańnie, jakaja była davoli typovaj dla bolš poźniaj karjery Lenana, ale z hetaha tady ničoha nie vyjšła.
Jak uspaminaje Lin, hurt patraciŭ na pieśniu niekalki hadzin, ale muzyki chutka zrazumieli, što materyjału niedastatkova.
«U pieśni byŭ prypieŭ, ale ŭ joj mała było ŭ sensie kupletaŭ. My zapisali akampaniemient, hruby nakid, jaki tak i nie skončyli».
Paźniej Poł Mak-Kartni skazaŭ, što Džordž Charysan tady nazvaŭ jakaść zapisu vakału Džona paršyvaj i admoviŭsia pracavać nad pieśniaj.
«U jaje była nie vielmi ŭdałaja nazva, jaje treba było trochi pierapracavać, ale ŭ jaje byŭ pryhožy kuplet, i jaho śpiavaŭ Džon», — skazaŭ jon časopisu Q.
«[Ale] Džordžu jana nie spadabałasia. «Bitłz» byli demakratyjaj, i my kinuli jaje».
Kazali taksama, što z aryhinalnym zapisam byli techničnyja prablemy: na im byŭ čutny pastajanny šum ad elektrapryboraŭ u kvatery Lenana.
U 2009 hodzie na pirackim dysku vypuścili novuju viersiju hetaha demazapisu biez fonavaha šumu. Prychilniki vykazali zdahadku, što hety zapis nie znajšli ŭ 1995 hodzie — i jon, mahčyma, byŭ skradzieny z kvatery Lenana razam ź inšymi asabistymi rečami paśla jaho hibieli.
U apošnija niekalki hadoŭ Poł Mak-Kartni nie raz kazaŭ pra svajo žadańnie skončyć pieśniu.
«Ja ŭsio jašče dumaju pra heta, — skazaŭ jon u dakumientalnym filmie BBC pra Džefa Lina ŭ 2012 hodzie. — Tak što ja źbirajusia pracisnucca na miesca Džefa i zrabić heta. Skončyć jaje kali-niebudź».
Staraja kasieta
Padobna, ciapier technałahičny prahres daŭ muzyku mahčymaść heta zrabić.
Pavarotnym momantam staŭ dakumientalny film Pitera Džeksana Get Back, u jakim śpiecyjalist pa mantažy dyjałohaŭ Emil de ła Rej navučaŭ kampjutary raspaznavać hałasy ŭdzielnikaŭ «Bitłz» i adździalać ich ad fonavych šumoŭ i instrumientaŭ dla stvareńnia čystaha huku.
Toj ža samy praces dazvoliŭ seru Połu «praśpiavać duetam» ź Lenanam u jaho niadaŭnim turne, a taksama dapamoh stvareńniu novych miksaŭ z abjomnym hučańniem dla alboma Revolver hurta «Bitłz», jaki pavinien byŭ być pierazapisany ŭ minułym hodzie.
«Jon [Džeksan] zmoh atrymać izalavany hołas Džona ź plonki na staroj kasiecie», — skazaŭ Makkartni ŭ intervju Bi-bi-si.
«U nas byŭ hołas Džona i pijanina, i jon zmoh padzialić ich z dapamohaj štučnaha intelektu. Jany kažuć kampjutaru: «Heta hołas, heta hitara. Prybiary hitaru».
«Tamu, kali my vyrašyli stvaryć toje, što stanie «apošniaj pieśniaj Bitłz», my ŭziali demazapis, jaki byŭ u Džona, zmahli adździalić hołas i zrabić jaho čystym z dapamohaj ŠI. I ciapier my možam źvieści zapis, jak heta zvyčajna robicca. Heta daje niekatoruju svabodu dziejańniaŭ».
Adnak muzyka pryznaŭsia, što inšyja prymianieńni štučnaha intelektu vyklikajuć u jaho niepakoj.
Čytajcie taksama:
Hurt Rammstein akazaŭsia na miažy raspadu
Eks-muzyka «Siabroŭ» raskazaŭ, što vyrazanyja im abrazy stali miratačyć