Biełaruskija sinoptyki zarehistravali hlebavuju zasuchu
14.06.2023 / 15:58
Biełhidramiet paviedamiŭ 13 červienia, što na bolšaj častcy terytoryi Biełarusi praciahvajecca niespryjalnaja ahramietearałahičnaja situacyja. U hlebie pad zbožžavymi kulturami zapasy praduktyŭnaj vilhaci zastajucca nizkimi. Daždžy prachodziać u asnoŭnym u paŭdniovaj častcy krainy, što nie dazvalaje palepšyć situacyju.
Pa infarmacyi asobnych mieteastancyj, hlebavaja zasucha dasiahnuła kryteryju niebiaśpiečnaj ahramietearałahičnaj źjavy. Na najbolš lohkich hlebach i ŭzvyšanych učastkach u zbožžavych kałasavych kultur nazirajecca pažaŭcieńnie, skručvańnie i zasychańnie liścia, miescami pačałosia zasychańnie raślin.
Surjozny deficyt hlebavaj vilhaci moža niehatyŭna adbicca na farmavańni praduktyŭnaści kołasa zbožžavych kultur, zapavolvaje rost ściabła lonu, a taksama jon niespryjalny dla adrastańnia traŭ paśla ŭkosu, jak kamientujuć situacyju sinoptyki.
Daždžy, jakija prachodziać u asnoŭnym u paŭdniovaj častcy krainy, tolki krychu źmiakčyli situacyju. Adnak na kardynalnaje palapšeńnie sinoptyki pakul nie raźličvajuć:
«U najbližejšy čas u bolšaści rajonaŭ krainy zachavajucca składanyja ahramietearałahičnyja ŭmovy».
Tolki ŭ druhoj pałovie hetaha tydnia na zachadzie Biełarusi (Hrodzienskaja i Bresckaja vobłaści) čakajucca bolš praciahłyja i intensiŭnyja daždžy.
Maj 2023 hoda staŭ u Biełarusi samym zasušlivym pačynajučy z 1945 hoda. Za miesiac u siarednim pa krainie vypała mienš za 12 mm apadkaŭ, heta ŭsiaho 19% ad klimatyčnaj normy.
Čytajcie taksama:
«My pačynajem pieražyvać». Bryło — pra ŭradžaj hetaha hoda
Ci čakać ciapła i daždžoŭ na nastupnym tydni? Prahnoz sinoptykaŭ