Starbucks заплаціць звольненай белай супрацоўніцы 25,6 мільёна даляраў па справе аб расавай дыскрымінацыі
Шэнан Філіпс, былая рэгіянальная менеджарка кампаніі Starbucks, была звольненая пасля таго, як у 2018 годзе ў адным з яе філіялаў у Філадэльфіі былі арыштаваныя двое чарнаскурых, што прывяло да масавых пратэстаў. Пры гэтым яе чарнаскуры калега захаваў працу.
15.06.2023 / 06:49
Фота: John Minchillo / AP
Суд прысяжных прыйшоў да высновы, што фактарам у яе звальненні стала яе расавая прыналежнасць, і гэта парушыла антыдыскрымінацыйныя законы, піша Бі-бі-сі.
Федэральнае журы суда ў Нью-Джэрсі ўстанавіла, што Starbucks парушыла федэральныя грамадзянскія правы Шэнан Філіпс, а таксама закон штата Нью-Джэрсі, які забараняе дыскрымінацыю па прыкмеце расы, прысудзіўшы ёй 600 000 даляраў у якасці кампенсацыі за шкоду і 25 мільёнаў даляраў у якасці штрафных санкцый.
Інцыдэнт у кафэ
Інцыдэнт адбыўся ў філіяле Starbucks у Філадэльфіі ў 2018 годзе, калі аднаму з двух цемнаскурых мужчын, якія знаходзіліся ў кафэ, не было дазволена скарыстацца прыбіральняй, бо ён нічога не купіў.
Мужчыны заявілі, што прыйшлі на дзелавую сустрэчу і некага чакаюць. Калі яны адмовіліся сыходзіць, супрацоўнікі, як паведамляецца, выклікалі паліцыю, якая надзела на іх кайданкі і вывела з кафэ.
Іх арышт быў зняты на відэа, апублікаванае пазней у сацсетках, што прывяло да пратэстаў. Starbucks закрыла ўсе свае 8000 кафэ ў ЗША на адзін дзень, каб правесці трэнінг для супрацоўнікаў, прысвечаны таму, як змагацца з прадузятасцю, у тым ліку расавай.
Рэгіянальная менеджарка кампаніі Шэнан Філіпс была звольнена, а чорны менеджар аддзялення, дзе адбыўся інцыдэнт, захаваў сваю працу.
У 2019 годзе Філіпс падала ў суд на Starbucks, абвінаваціўшы кампанію ў незаконным звальненні і несправядлівым пакаранні белых супрацоўнікаў.
Яе адвакаты сцвярджалі, што найвышэйшае кіраўніцтва Starbucks шукала казла адпушчэння, якога можна было б звольніць і паказаць, што захады зробленыя.