Расійскія прапагандысты следам за Залужным хаваюць Буданава
Расійскія прапагандысты паведамілі пра чарговы нібыта фенаменальны поспех сваіх вайскоўцаў і спецслужбаў. Паводле іх, яшчэ 29 мая расійскай ракетай быў цяжка паранены кіраўнік украінскай вайсковай разведкі Кірыла Буданаў.
15.06.2023 / 18:18
Кірыл Буданаў. Фота: Новое время
РІА «Навіны» са спасылкай на сваю крыніцу сцвярджае, што расійская ракета патрапіла ў будынак украінскага Галоўнага ўпраўлення разведкі, ды акурат у суседні з Буданавым кабінет. У выніку, маўляў, цяпер Буданаў у цяжкім стане знаходзіцца ў шпіталі ў Берліне.
Падобна на тое, што акурат да гэтай «спецаперацыі» можа мець дачыненне ўзнагароджанне лукашэнкаўскіх сілавікоў расійскімі ўзнагародамі, якое адбылося 1 чэрвеня. Пра сам яго факт у прэсе паведамлялася, а за што канкрэтна было тое ўшанаванне — афіцыйна не казалі.
У той жа час прапагандыст Вадзім Гігін, які днямі стаў дырэктарам Нацыянальнай бібліятэкі, у праграме «Вечар з Уладзімірам Салаўёвым», дзе ён ёсць частым госцем, нядаўна казаў наступнае:
«Дырэктар ФСБ Аляксандр Бортнікаў узнагародзіў беларускіх афіцэраў-разведчыкаў. Чаму пра гэта абвясцілі публічна? Гэта была аперацыя «Валькірыя 2.0», для якой былі вызначаныя каардынаты. Усе ведаюць, дзе знаходзіцца Рыбальскі востраў, гэта штаб-кватэра ГУР Кірыла Буданава. Адбыўся момант, калі там знаходзіліся прадстаўнікі кіраўніцтва і нейкія разведчыкі, якіх кшталту як узнагароджвалі. Удар аказаўся вельмі адчувальным, мякка кажучы».
Раней расійская прапаганда (а за ёй і беларуская) цягам мая запускала інфармацыю пра тое, што спачатку нібыта загінуў, а пасля быў цяжка паранены галоўнакамандуючы УСУ Валерый Залужны. Ён сапраўды не з'яўляўся на публіцы некалькі тыдняў, але 25 і 26 мая з'явіўся і на фота, і на відэа.
Апошняе на сённяшні дзень відэа з Кірылам Буданавым з'явілася 11 чэрвеня. У ім кіраўнік украінскай разведкі паўхвіліны глядзіць у камеру і не гаворыць ні слова, а напрыканцы роліка з'яўляецца надпіс «Планы любяць цішыню».
Чытайце таксама:
Расіяне не мелі іншага плана захопу Кіева, як высадка ў Гастомелі — Буданаў
«У мяне была прабітая спіна, шыя». Кірыла Буданаў расказаў пра цяжкое раненне, атрыманае на Данбасе