Bolš za ŭsio ad raźvićcia štučnaha intelektu paciarpiać rabotniki razumovaj pracy — analityki
Pavodle novaj spravazdačy kampanii McKinsey, suśvietny bum ukaranieńnia štučnaha intelektu raspačnie epochu značnaha rostu pradukcyjnaści i bolšaha roskvitu dla adnych dy hłybokich uzrušeńniaŭ dla inšych, u pieršuju čarhu dla rabotnikaŭ razumovaj pracy.
18.06.2023 / 16:13
Vyjava: vecteezy.com
Na heta źviartaje ŭvahu Bloomberg, spasyłajučysia na niadaŭna apublikavanaje daśledavańnie aŭtarytetnaj mižnarodnaj kansałtynhavaj kampanii, jakaja śpiecyjalizujecca na rašeńni zadač, źviazanych sa stratehičnym kiravańniem.
Padčas daśledavańnia razhledzieli 63 varyjanty vykarystańnia hienieratyŭnaha štučnaha intelektu (ŠI) prykładna ŭ 850 prafiesijach. Heta typ ŠI moža hienieravać tekst, malunki, muzyku abo inšyja miedyjadanyja na asnovie padkazki.
U zaležnaści ad taho, jak technałohiju prymuć i buduć realizoŭvać, rost pradukcyjnaści, jak adznačajuć analityki, moža varjiravacca ad 0,1% da 0,6% na praciahu nastupnych 20 hadoŭ.
Pavodle daśledavańnia, hienieratyŭny ŠI moža prynosić ad 2,6 trłn da 4,4 trłn dalaraŭ štohod u 63 praanalizavanych varyjantach vykarystańnia. Dla paraŭnańnia: uvieś VUP Vialikabrytanii ŭ 2021 hodzie skłaŭ 3,1 trłn dalaraŭ.
Bloomberg cytuje adnu z aŭtaraŭ spravazdačy — staršyniu rady McKinsey Technology Łarejnu Ji (Lareina Yee):
«Hienieratyŭny štučny intelekt daść ludziam novuju «zvyšzdolnaść», a ekanomicy — takuju nieabchodnuju dadatkovuju pradukcyjnaść. Kiraŭniki biznesu pavinny razumieć, jakija vidy dziejnaści mohuć być źmienienyja z dapamohaj novych technałohij, zasnavanych na štučnym intelekcie, i jak jany žadajuć pieraasensavać svaje pracesy i stratehii. Heta patrabuje ad ich lidarskaha vybaru i efiektyŭnaj realizacyi».
U spravazdačy havorycca, što transfarmacyja ŭzmocnić nahruzku na pracoŭnuju siłu, asabliva na vysokaapłatnych pracaŭnikoŭ razumovaj pracy, čyja dziejnaść «raniej ličyłasia adnosna niaŭraźlivaj dla aŭtamatyzacyi».
Jak zaŭvažaje Bloomberg, niekalki hadoŭ tamu McKinsey padličyła, što kala pałovy pracoŭnaha času va ŭsim śviecie marnujecca na zadačy, jakija možna aŭtamatyzavać. Ciapier kampanija padnimaje hety pakazčyk da 60-70% i adznačaje, što supracoŭniki šmatlikich firmaŭ mohuć vyjavić, što ich čas pieraraźmierkavany abo što ich pracoŭnyja miescy źnikajuć.
«Rabotnikam spatrebicca padtrymka ŭ navučańni novym navykam. Niekatoryja ź ich źmieniać rod zaniatkaŭ»,
— havorycca ŭ spravazdačy.
Pavodle spravazdačy, kala 75% patencyjnaj kaštoŭnaści prykładnoha hienieratyŭnaha ŠI budzie prypadać na čatyry biznes-funkcyi: praca z klijentami, markietynh i prodaž, raspracoŭka prahramnaha zabieśpiačeńnia, a taksama daśledavańni i raspracoŭki.
U spravazdačy havorycca, što novaja technałohija dazvolić bankam pavysić pradukcyjnaść pracy i zadavolenaść klijentaŭ, dapamoža ŭ pryniaćci rašeńniaŭ i źnizić ryzyku machlarstva za košt lepšaha manitorynhu. U vyniku heta pryniasie bankam dadatkovyja 200-340 miljardaŭ dalaraŭ. Heta adpaviadaje skačku apieracyjnaha prybytku ad 9% da 15%.
Na dumku analitykaŭ McKinsey, u halinie daśledavańniaŭ i raspracovak hienieratyŭny ŠI moža pavysić pradukcyjnaść pracy na 10-15%. U jakaści prykładu ŭ spravazdačy pryvodziacca navuki ab žyćci (bijanavuki) i chimičnaja pramysłovaść. U hetych śfierach štučny intelekt moža chutčej hienieravać novyja malekularnyja struktury, paskarajučy praces raspracoŭki novych lekaŭ i materyjałaŭ. Heta moža pavialičyć prybytak farmaceŭtyčnych kampanij i vytvorcaŭ miedycynskich tavaraŭ na cełych 25%.
Jak adznačaje Bloomberg, raźvićcio štučnaha intelektu idzie chutčej, čym čakałasia. Kali raniej analityki McKinsey śćviardžali, što 2027 stanie pieršym hodam, kali technałohija štučnaha intelektu zmoža adpaviadać pradukcyjnaści typovaha čałavieka ŭ zadačach, źviazanych z «razumieńniem naturalnaj movy», to ŭ novaj spravazdačy adznačajecca, što heta adbudziecca ŭ hetym hodzie.
U spravazdačy taksama adznačajecca, što ŭkaranieńnie aŭtamatyzacyi budzie adbyvacca chutčej u raźvitych krainach, dzie bolš vysokaja zarabotnaja płata zrobić jaje mahčymaj raniej, čym u biadniejšych. Heta paŭpłyvaje na pracu biełych kaŭnierykaŭ značna bolš, čym na ludziej, zaniatych fizičnaj pracaj.
U hetym płanie, jak adznačaje Bloomberg, takaja technałahičnaja madernizacyja adroźnivajecca ad papiarednich značnych technałahičnych abnaŭleńniaŭ, jakija časta ŭščamlali intaresy prafiesij, dzie rabotniki mieli nizkuju adukacyjnuju padrychtoŭku i mała zarablali.
Jak adznačajecca ŭ spravazdačy McKinsey, novyja technałohii, zasnavanyja na štučnym intelekcie, «pastaviać pad sumnieŭ nieabchodnaść atrymańnia šmathadovaj adukacyi».
Vydańnie Bloomberg źviartaje ŭvahu na toje, što prahnozy McKinsey pa składzie pracoŭnaj siły adpaviadajuć vysnovam daśledavańnia Nacyjanalnaha biuro ekanamičnych daśledavańniaŭ, apublikavanym u hetym miesiacy navukoŭcami z Kałumbijskaj biznes-škoły, Merylendskaha ŭniviersiteta, Kalifarnijskaha ŭniviersiteta ŭ Bierkli i fondu AI for Good.
Hetaje daśledavańnie taksama pradkazała značnuju rearhanizacyju pracy.
«Inviestycyi ŭ štučny intelekt zrobiać strukturu firmaŭ bolš zhładžanaj. Značna pavialičycca dola rabotnikaŭ małodšaha źviana i pamienšaje dola rabotnikaŭ siaredniaha i starejšaha źviana»,
— cytuje Bloomberg vysnovy amierykanskich navukoŭcaŭ.
Čytajcie jašče: