«Мы лічым, што гэта проста здзек над нашай супольнасцю». Рыбаловы Магілёўшчыны абурыліся, што іх праганяюць з большасці вадаёмаў
Магілёўскі аблвыканкам у 2022 годзе зацвердзіў пералік вадаёмаў, у якіх дазваляецца займацца падводным паляваннем, а таксама лавіць рыбу на дарожку з маторных лодак. Цяпер жа гэты пералік вынесены на грамадскае абмеркаванне, каб пачуць галасы саміх рыбакоў. І галасы прагучалі вельмі незадаволеныя, піша «Магілёў.Media», сабраўшы найбольш характэрныя рэакцыі.
19.06.2023 / 16:31
Падводныя паляўнічыя абураныя тым, што вадаёмы для рэалізацыі іхняга захаплення ім даюць «адчэпныя», якія не падыходзяць для гэтага па сваіх прыродна-біялагічных умовах.
Карыстальнік з нікам Buba1404 пракаментаваў новаўвядзенне наступным чынам:
«Я жыву ў Бабруйску, у Бабруйскім раёне. Нам, падводным паляўнічым, выдзелілі тры вадаёмы на ўвесь раён для занятку падводным паляваннем! З іх возера Драгічын (балота, у якім ніколі не бывае празрыстай вады і туды дабрацца можна толькі на верталёце), возера Плывун, у якім таксама ніколі няма празрыстасці, і возера Снарады, у якім празрыстая вада бывае раз на 3-4 гады.
У суседніх раёнах сітуацыя такая ж. У Асіповіцкім дазволілі Асіповіцкае вадасховішча і раку Свіслач, у якіх няма празрыстасці. У Глускім — рака Пціч, у якой штосьці можна ўбачыць адзін месяц у годзе. І так можна пералічыць усе найбліжэйшыя раёны.
Мы лічым, што гэта проста здзек над нашай супольнасцю падводных паляўнічых, якія плацяць, у адрозненне ад рыбакоў унёскі, але скарыстацца сваім правам не могуць! Улічваючы, што нас на ўсю Беларусь каля 3000 чалавек.
Цалкам падтрымліваю варыянт вяртання да спісаў забароненых вадаёмаў. А калі пакуль такой магчымасці няма, трэба раіцца з супольнасцю наконт кожнага вадаёма, які вы ўносіце ў спіс дазволеных вадаёмаў.
На дадзены момант нам займацца падводным паляваннем няма дзе! А грошы мы заплацілі! Пытанне, за што?».
«Падводная рыбалка (паляванне) — вельмі складаны і цяжкі працэс, патрабуе сур’ёзнай фізічнай, маральнай, матэрыяльнай падрыхтоўкі, які, насуперак распаўсюджанаму памылковаму меркаванню, не забяспечвае вялікага рэгулярнага ўлову. — піша іншы карыстальнік, «balorek by Мелешко». — Акрамя гэтага падводны паляўнічы сістэматычна выяўляе сеткі, у тым ліку і забытыя, жакі, і наогул з’яўляецца раздражняльным фактарам для браканьераў.
У бягучых рэаліях зусім незразумелая матывацыя чыноўнікаў для забароны тых ці іншых вадаёмаў. Забарона не грунтуецца ні на якіх навуковых даных, выніках даследаванняў, а толькі на прынцыпе перакладання адказнасці.
Напрыклад, мясцовай адміністрацыі Клічаўскага раёна зусім нецікавы лёс ракі Ольса, але вось падводнае паляванне ў гэтай рацэ яны чамусьці забаранілі. Чаму? На чым засноўваецца рашэнне аб забароне падводнага палявання на дадзеным вадаёме? Чыгірынскае вадасховішча — гіганцкі вадаём, чаму там забароненая падводная рыбалка (паляванне)?»
«Вельмі доўга ўводзяцца дапаўненні да пераліку дазволеных вадаёмаў. А зараз яшчэ і баяцца, ці правільна зрабілі і прыдумалі абмеркаванне. Такія дапаўненні трэба рабіць кожны месяц, а не раз у год і потым выхваляцца, што вось мы выдалі дакумент і прарабілі вялікую працу.
Людзям рыбачыць зараз не стала дзе. Неабходна пашыраць пералік і вельмі значна. Раней больш за 10000 вадаёмаў былі дазволеныя, а зараз сотні. Што памянялася?
Норма лоўлі для ўсіх спосабаў аднолькавая, дык навошта гэтыя абмежаванні цяпер? Ці раней, на працягу многіх гадоў, нехта моцна памыляўся, дазваляючы рыбачыць у такой колькасці вадаёмаў? Не, зараз дапусцілі памылку і нават можна сказаць, уціск правоў грамадзян. З гэтымі спісамі дазволеных вадаёмаў ужо сутыкаліся раней і было шмат перагібаў на месцах, некампетэнтнасці», — так пракаментаваў дакумент карыстальнік Валерый Сінкевіч.
Чытайце таксама:
У Мазыры п'яныя рыбаловы не падзялілі ўлоўнае месца, ёсць ахвяра