«Lubimaja hrupa Pucina» za čas vajny atrymała ad uładaŭ vielizarnyja hrošy. Heta bolš, čym za papiarednija vosiem hadoŭ
Navat śpiavak Shaman, jaki staŭ adnym z hałoŭnych hałasoŭ hetaj vajny, zarabiŭ mieniej.
20.06.2023 / 10:05
Fota: ura.ru
Hrupa «Lube» paśla 24 lutaha 2022 hoda zarabiła na dziaržpadradach 57,6 młn rasijskich rubloŭ (kala 725 tysiač dalaraŭ), što na 35% bolš, čym za papiarednija vosiem hadoŭ. Navat śpiavak Shaman, jaki staŭ adnym z hałoŭnych hałasoŭ hetaj vajny, zarabiŭ u 1,5 razu mienš za «lubimuju hrupu Pucina» — blizu 38 młn rubloŭ (475 tysiač dalaraŭ), padličyła «Ahienctva», vyvučyŭšy źviestki sajta dziaržzakupak.
Samy vialiki hanarar paśla pačatku vajny hurtu vypłacili za vystup na 50-hoddzi horada Nadyma ŭ vieraśni 2022 hoda — 10 młn rubloŭ (125 tysiač dalaraŭ). Jašče za čatyry kancerty «Lube» zapłacili ad 6 młn rubloŭ (75 tysiač dalaraŭ) u Murmansku, u Nižnim Noŭharadzie i dvojčy ŭ Sočy.
Za 2021 hod «lubimaja hrupa Pucina» atrymała dziaržpadrady na ahulnuju sumu 11,8 młn rubloŭ. Siaredni ček adnaho dziaržpadradu z pačatku vajny vyras adrazu ŭdvaja. Kali ŭ 2021 hodzie z adnoj damovy hrupa atrymlivała ŭ siarednim 2,4 młn rubloŭ, to paśla pačatku vajny hetaja ličba vyrasła da amal 5 młn rasijskich rubloŭ.
Apošni ŭsplosk popytu na hrupu siarod dziaržzakazčykaŭ zdaryŭsia ŭ 2014 hodzie, kali rasijskija ŭłady anieksavali Krym. Tady za hod «Lube» zarabiła 7 młn rasijskich rubloŭ, što až da 2021 hoda było rekordam dla hrupy pa hadavym dachodzie ź dziaržpadradu.
Za 8 hadoŭ — z 2014 pa 2021 hady — hrupa zarabiła 42,4 młn rubloŭ.
Śpiavak Shaman, jaki staŭ viadomym dziakujučy «patryjatyčnym pieśniam» «Ustaniem» i «Ja ruski», paśla pačatku vajny zaklučyŭ damovy na vystupy ź dziaržustanovami i dziaržkampanijami na 37,7 młn rubloŭ (471 tysiača dalaraŭ). Jaho maksimalny dachod z adnaho vystupu — 8 młn rubloŭ (100 000 dalaraŭ), takaja suma vypłat za vystupy na Dni horada Narylska, Dni Usievałažska i ŭ Sočy.
Rost dziaržvydatkaŭ na hrupy nakštałt «Lube» paśla pačatku vajny, mahčyma, źviazany z uzmacnieńniem prapahandy. U pieśniach «Lube» havorycca pra sałdackaje braterstva, pačućcio abaviazku pierad Radzimaj.
Doŭhi čas salist hurta Mikałaj Rastarhujeŭ vystupaŭ u vajskovym kicieli. U rasijskich miedyja kalektyŭ časta nazyvajuć «lubimaj hrupaj Pucina», sam prezident Rasii pryznavaŭ, što jana jamu padabajecca.
Paśla pačatku ŭvarvańnia va Ukrainu Rastarhujeŭ sustrakaŭsia z vajskoŭcami i zyčyŭ im «viarnucca ź pieramohaj».