Intercars zapuściŭ pramyja aŭtobusnyja rejsy ŭ Krym
I jany karystajucca vialikaj papularnaściu, jak kažuć arhanizatary turu.
22.06.2023 / 09:57
Fota: Blizko.by
Intercars zapuściŭ aŭtobusnyja rejsy ź Minska na paŭdniovy bierah anieksavanaha Kryma — u Jałtu i sanatoryj «Biełoruśsija» ŭ Mischory. Aŭtobus idzie praz Homiel, Bransk, Aroł, Varoniež, Rastoŭ-na-Donie, Krasnadar, Fieadosiju, Simfieropal i Ałuštu. Heta 2450 kiłamietraŭ, a čas składaje 39,5 hadziny.
Dyrektarka kampanii «Bajertrans» (jana pradstaŭlaje Intercars u Biełarusi) Julija Burdon-Sabieckaja raskazała dla blizko.by:
«My zapuścili aŭtobusy ŭ Jałtu i Krasnadarski kraj, jakija ciapier karystajucca vialikaj papularnaściu. Praz prablemy ź vizami ŭ biełarusaŭ zastaŭsia nie vielmi vialiki vybar, tamu Krymskaje ŭźbiarežža i Krasnadarski kraj pryciahvajuć niamała turystaŭ. Maršruty doŭhija, adnak my bačym dobry popyt na hetyja kirunki i ŭstojlivy pasažyrapatok».
«Pasažyram dastupnyja mnohija paŭdniovyja napramki: Rastoŭ i Krasnadar, Anapa i Viciazieva, Fieadosija, Jałta, Ałušta, Simfieropal. U hetyja harady ciapier možna pajechać ź Minska. U Rastoŭskuju vobłaść i Krasnadarski kraj ź Minska iduć pramyja aŭtobusy, pry pajezdcy ŭ harady Kryma treba zrabić pierasadku ŭ Bransku, bo druhoje «plačo» maršrutu absłuhoŭvajecca rasijskaj kampanijaj», — praciahvaje Julija.
Biełaruski aŭtobus davozić pasažyraŭ da Branska, dzie tyja pierasadžvajucca ŭ aŭtobus Yutong, u jakim jość ramiani biaśpieki, Wi-Fi i USB-razietki.
«Maršrut doŭhi, aŭtobus znachodzicca ŭ šlachu da kancavoha prypynku amal 40 hadzin, tamu my dosyć časta — kožnyja 4-4, 5 hadziny — robim prypynki ŭ kafe z tualetami. Spyniajemsia ŭ tych miescach, jakija śpiecyjalna ŭładkavanyja dla pryjomu aŭtobusaŭ i dzie jość adrazu pa 5-6 kabinak, kab nie vystrojvalisia čerhi», — havoryć Burdon-Sabieckaja.
«My ŭličvajem toje, što ź niadaŭnich časoŭ na biełaruska-rasijskaj miažy ŭviali pahłyblenyja pravierki, i ŭ raskład zakładvajem čas na vykanańnie ŭsich farmalnaściaŭ. Viadoma, treba razumieć, što ŭ letni čas na paŭdniovym kirunku šmat mašyn i ruch moža być uskładnieny. Ale my ŭkładvajemsia ŭ raskład», — kaža pradstaŭnica kampanii.
Kvitok ad Minska da kančatkovaha punkta padarožža — sanatoryja «Biełoruśsija» ŭ Mischory — kaštuje 275 rubloŭ. Dla dziaciej, moładzi i piensijanieraŭ praduhledžanaja źnižka ŭ 10%, taksama jość źnižki na hrupavyja bilety.
U płanach — zapuścić rejsy ŭ Jeŭpatoryju ŭ anieksavanym Krymie i ŭ Tuapse i Sočy ŭ Krasnadarskim krai.