Praciahvajucca zatrymańni na miežach pry ŭjeździe ŭ Biełaruś
Pravaabaroncy paviedamlajuć, što hetymi dniami byli zafiksavanyja niekalki vypadkaŭ, kali ludziej, jakija viartalisia ŭ Biełaruś z Polščy ci Litvy, zatrymlivali na miažy.
22.06.2023 / 23:25
Tak, pravaabaroncam «Viasny» raskazali, što siońnia ŭnačy pa viartańni z Polščy ŭ Biełaruś paśla pravierki telefonaŭ byli zatrymanyja niekalki čałaviek. Ich źniali z aŭtobusa, dalejšyja ich losy nieviadomyja.
Raniej paviedamlałasia pra aryšt niekalkich čałaviek u aeraporcie «Minsk», dzie ŭ ludziej taksama praviarajuć telefony i rečy.
Taksama, pavodle infarmacyi pravaabaroncaŭ, 20 červienia na pamiežnym punkcie «Katłoŭka» na miažy ź Litvoj zatrymali žančynu: jaje źniali z rejsavaha aŭtobusa. Dalejšy jaje los nieviadomy.
Viadoma, što ŭ mai ŭ Astraŭcy adbyłosia niekalki sudoŭ nad zatrymanymi na biełaruska-litoŭskaj miažy, viadoma pra dva štrafy ŭ 1110 rubloŭ i 5 sutak aryštu za padpiski na «ekstremisckija» kanały.
Pravaabaroncam «Viasny» taksama stali viadomyja fakty, kali ludziej uzmocniena nadhladajuć i dapytvajuć pry viartańni ŭ Biełaruś, hladziać telefony i sacsietki, ale ŭ vyniku adpuskajuć — adnak na nastupny dzień da ich prychodziać siłaviki ź pieratrusami.
U suviazi z hetym pierad tym, jak viartacca ŭ Biełaruś, pravaabaroncy rajać acanić usie ryzyki patrapić pad pieraśled. Na čas pravierki, prynamsi, varta adpisvacca ad «ekstremisckich» kanałaŭ i vydalać fota, jakija mohuć vyklikać pytańni ŭ siłavikoŭ.
Čytajcie taksama:
Palitviazień Kirył Suślin całkam adbyŭ termin i vyjšaŭ na volu
U Minsku zatrymali piłota Dźmitryja Matkoŭskaha
Viaźni navapołackaj kałonii miarkujuć, što ŭ Viktara Babaryki insult