U Biełaruś lacić prezident, jaki kiruje svajoj krainaj 44 hady
U paniadziełak Alaksandr Łukašenka prymie ŭ haściach lidara Respubliki Ekvataryjalnaja Hvinieja Teadora Abijanha Nhiema Mbasoha, jany praviaduć pieramovy.
24.06.2023 / 14:31
Teadora Abijanh Nhiema Mbasoha Fota: Wikimedia Commons
Aficyjny vizit Mbasoha ŭ Minsk pačniecca ŭ niadzielu, 25 červienia, i pradoŭžycca dva dni. Zapłanavany aficyjnaja sustreča i pieramovy ŭ vuzkim i pašyranym składach, jany projduć u Pałacy Niezaležnaści.
Pa vynikach sustrečy na najvyšejšym uzroŭni baki majuć namier padpisać pakiet dvuchbakovych dakumientaŭ, u jakich havorka idzie ab raźvićci adnosin u roznych napramkach ― ad ekanomiki da humanitarnaj śfiery.
U chodzie vizitu lidaru Ekvataryjalnaj Hviniei prademanstrujuć mahčymaści pramysłovaha i ahrarnaha siektaraŭ Biełarusi.
U Ekvataryjalnaj Hviniei jość bahatyja naftavyja radoviščy, jakija razam z zamiežnymi inviestycyjami dapamahli zrabić krainu adnoj z samych zamožnych i stabilnych dziaržaŭ Afryki. Pačynajučy z 1990-ch hadoŭ heta kraina stała bujnym eksparcioram nafty, za košt čaho VUP na dušu nasielnictva padniaŭsia na pieršuju pazicyju ŭ kantynientalnaj Afrycy. Pa indeksie čałaviečaha raźvićcia Ekvataryjalnaja Hvinieja znachodzicca na 145-m miescy ŭ śviecie.
Teadora Abijanhu Nhiema Mbasoha — 81 hod. Jon byŭ kadravym vajskoŭcam, kamandujučym Nacyjanalnaj hvardyjaj. U žniŭni 1979 hoda ažyćciaviŭ vajskovy pieravarot i zrynuŭ pažyćciovaha prezidenta krainy, svajho rodnaha dziadźku — Fransiska Masijasa Nhiema. Potym dziadźku prysudzili śmiarotnaje pakarańnie i ŭ toj ža dzień rasstralali.
Teadora Abijanh Nhiema Mbasoha kiruje krainaj amal 44 hady. Sa studzienia 1986 hoda adnačasova zajmaje taksama pasadu ministra abarony krainy. Na vybarach 1996 hoda jon byŭ adzinym kandydatam i za jaho prahałasavali 97,85% čałaviek. Na nastupnych prezidenckich vybarach, jakija prajšli ŭ 2002 hodzie, jon byŭ znoŭ pieraabrany 97,1% hałasoŭ.
Taksama Teadora Abijanh Nhiema Mbasoha časta pryznačaje na najvyšejšyja dziaržaŭnyja pasady svaich svajakoŭ. Teadora Nhiema Abijanh Manhu, syn prezidenta ad pieršaha šlubu, u rozny čas pracavaŭ ministram lesu, rybnaj haspadarki i navakolnaha asiarodździa (2001—2003), ministram infrastruktury i lesu (2003—2004), a z 2004 hoda ŭznačalvaje Ministerstva sielskaj haspadarki i lesu.
Habryel Mbieha Abijanh Lima, syn prezidenta ad druhoha šlubu, byŭ dziaržaŭnym sakratarom pa zdabyŭnoj pramysłovaści i vuhlevadarodach (2001—2004), zatym byŭ pryznačany namieśnikam ministra hornazdabyŭnoj pramysłovaści i enierhietyki. Antonia Mba Nhiema, małodšy brat prezidenta, pracavaŭ hienieralnym dyrektaram palicyi.
I takich svajakoŭ jašče ź dziasiatak.