Vajar pałka Kalinoŭskaha: «Biełarusy — mirnyja ludzi» — łuchta, naviazanaja nam z Uschodu
Kamandzir minamiotnaha raźliku pałka Kalinoŭskaha ŭ repartažy «Biełsatu» raskazaŭ pra svoj šlach u połk, jaho adroźnieńnie ad inšych vajskovych farmavańniaŭ i šlach vyzvaleńnia Biełarusi.
27.06.2023 / 18:07
Na dumku bajca pałka Kalinoŭskaha, tolki paŭstańnie moža pryvieści da źmienaŭ u Biełarusi. Skryn videa
Šlach va Ukrainu
Kamandzir minamiotnaha raźliku bataljona «Lićvin» pałka Kalinoŭskaha z pazyŭnym Miryk raniej pracavaŭ patrulnym milicyjantam u Frunzienskim RUUS Minska.
«Dumaŭ i płanavaŭ dalej pastupać u vyšejšuju navučalnuju ŭstanovu. Ale ŭsio źmianiłasia ŭ 2020-m. U hetym palityčnym kryzisie ja vyrašyŭ dla siabie pryniać bok zakonu. Ułasna, z-za čaho ja i išoŭ pracavać u milicyju. Ja nie zmoh zastavacca nadalej u sistemie, jakaja parušyła ŭsie pravavyja normy i zakony. Vyrašyŭ pačać svaju baraćbu za svaju krainu», — zhadvaje Miryk.
Paśla zvalnieńnia ź milicyi małady čałaviek chadziŭ na akcyi pratestu. A kali akcyi pačali zhasać, jon vyrašyŭ źjechać va Ukrainu.
«Ja vyrašyŭ źjechać tudy, dzie adčuvaŭ, što mahu być karysnym dla Biełarusi, dzie jość mahčymaść atrymać niejkija navyki, raźvivacca ŭ peŭnym napramku. I kab kraina była maksimalna zručnaj dla adaptacyi. Ja zrazumieŭ, što heta budzie Ukraina».
Słužba ŭ pałku Kalinoŭskaha
Va Ukrainie małady čałaviek pajšoŭ słužyć u bataljon «Danbas». 24 lutaha 2022 hoda Miryk znachodziŭsia ŭ vučebnym centry «Dziasna». Kali bajec daviedaŭsia pra farmavańnie pałka Kalinoŭskaha, to vyrašyŭ pierajści ŭ jaho.
«Kali paraŭnoŭvać połk Kalinoŭskaha z Uzbrojenymi siłami Ukrainy, to połk — vielmi hnutkaje padraździaleńnie. U nas niama šmat času na avałodańnie śpiecyjalnaściami. Tut ludzi bolš univiersalnyja, bo mohuć chutka mianiać prafiesii, atrymlivać dadatkovyja śpiecyjalnaści i vykarystoŭvać ich. Naprykład, ty možaš być ciažkim kulamiotčykam i sapioram, kulamiotčykam-snajpieram, minamiotčykam-paramiedykam. Bo ŭ nas niama takoha vialikaha mabilizacyjnaha reziervu. My znachodzimsia ŭ takich umovach, kali nam treba ŭsiamu navučycca i ŭsiudy pabyvać», — adznačaje małady bajec.
Miryk raskazaŭ pra toje, što jaho padraździaleńnie pabyło šmat dzie, kantaktavała z roznymi padraździaleńniami i bryhadami va Ukrainie. «My ekśpierymientujem z roznymi farmatami apieracyj. My prymajem udzieł u šturmach i adbivajem ich. Śpiektr vielmi vialiki. I tak pracavać našmat pryjemniej, bo jość mahčymaść nie zastojvacca na adnym miescy i vielmi chutka vučycca. U takim farmacie i maralna lahčej pracavać», — dzielicca svaim dośviedam Miryk.
Udzieł u bajach za Bachmut
Bajec zhadvaje, što ŭ jakaści kamandzira raźliku jon pracavaŭ na danieckim, łuhanskim, chiersonskim, zaparožskim, charkaŭskim napramkach. Siarod roznych nasielenych punktaŭ byli i vakolicy Bachmuta.
«My pracavali ŭ pramysłovaj i haradskoj zabudovie. Artyleryja praciŭnika pracavała vielmi prycelna, vielmi ščylna. U dzień pa piać-šeść pakietaŭ «Hradu» zalatała. I stvolnaja artyleryja, minamioty, tanki. Uvieś śpiektr ciažkoha ŭzbrajeńnia, jaki byŭ u praciŭnika, vykarystoŭvaŭsia.
Niahledziačy na ščylnuju pracu varožaj artyleryi, my dobra vykanali našu rabotu. U nas šmat zadakumientavanych traplańniaŭ. My pracavali i na padaŭleńnie varožaj piachoty. Źniščali budynki, dzie źbirałasia piachota praciŭnika, składy z bojekamplektam. Pa sutnaści, tam kožny dzień była stralanina»,
— zhadvaje Miryk pra bai za Bachmut.
Šlach da vyzvaleńnia Biełarusi
Na dumku bajca pałka Kalinoŭskaha, tolki paŭstańnie moža pryvieści da źmienaŭ u Biełarusi.
«My sprabavali pa-roznamu. Sprabavali jašče našy baćki. Možna zhadać 1990-ja, nulavyja, 2010-y. My ŭžo čaćviorty raz nastupajem na adny i tyja ž hrabli. Tak nie atrymlivałasia, nie atrymlivajecca i nie budzie atrymlivacca z hetym typam uzurpacyi ŭłady. Heta niemahčyma. Tamu što chunta vybudavanaja na padtrymcy siłavikoŭ.
Siłavik asabliva nie abciažarany sumleńniem, jak pakazała praktyka. A ja heta viedaju nie pa čutkach. Ja pracavaŭ z takimi pradstaŭnikami našaj nacyi, što ciažka ŭjavić. Jany pakul nie ŭbačać siłu, nie zrazumiejuć, što ciapier užo skončylisia razmovy i hulańni, u ich u hałavie ničoha nie pstryknie. Jany pavažajuć siłu. Jany bajacca, kali niechta macniejšy za ich».
Na dumku Miryka, «kali my chočam nazyvacca jeŭrapiejskaj nacyjaj, to nam treba adkinuć tezis ab tym, što «biełarusy — mirnyja ludzi», pierastać vieryć u hetuju łuchtu, jakuju nam naviazaŭ «starejšy brat» z Uschodu. Nieabchodna pakazać siabie jak mocnaja jeŭrapiejskaja i śviadomaja nacyja».
Čytajcie jašče:
Sachaščyk: Šancaŭ u biełaruskaj sistemy vystajać u kryzisnaj situacyi niama