Jak vyhladajuć biełaruskija piensii na fonie susiedziaŭ i kolki hrošaj zastajecca paśla apłaty kamunalnych pasłuh
U mai piensii ŭ siarednim vyraśli na 5%. Paraŭnali, jak roźniacca piensii ŭ Biełarusi, Polščy, Litvie, Łatvii i Rasii.
29.06.2023 / 09:04
Ilustracyjny zdymak: «Naša Niva»
Biełaruś
Pamier siaredniaj piensii za maj skłaŭ 690,9 rubla, što składaje kala 215 jeŭra, ci kala 230 dalaraŭ.
Biełaruskija mužčyny vychodziać na piensiju va ŭzroście 63 hadoŭ, a žančyny ŭ 58 hadoŭ.
Rasija
U Rasii siaredniaja piensija składaje kala 20 tysiač rasijskich rubloŭ. Heta taksama kala 215 jeŭra pa biahučym kursie. Sioleta na piensiju pa ŭzroście ŭ Rasii nie vyjdzie nichto. Heta adbyłosia z-za tak zvanaha pierachodnaha pieryjadu paśla piensijnaj reformy. Letaś u RF na piensiju vychodzili žančyny va ŭzroście 56,5 hoda, a mužčyny ŭ 61,5 hoda. Naleta ŭzrost novych piensijanieraŭ budzie składać 58 i 63 hady adpaviedna. Da 2028 hoda zapłanavana pastupovaje pavieličeńnie piensijnaha ŭzrostu da 60 i 65 hadoŭ.
Litva
Ciapier piensijny ŭzrost u Litvie składaje 64 hady dla žančyn i 64 hady i 6 miesiacaŭ dla mužčyn. U 2026 hodzie piensijny ŭzrost zrobiać adnolkavym dla ŭsich — 65 hadoŭ.
Siaredniaja piensija ŭ Litvie składaje 575 jeŭra, ci kala 1900 rubloŭ pa biahučym kursie.
Łatvija
U Łatvii na piensiju iduć u 64,5 hoda, niezaležna ad połu. Siaredniaja piensija ŭ hetaj krainie Bałtyi składaje 527 jeŭra, ci kala 1740 rubloŭ.
Polšča
Siaredniaja piensija ŭ Polščy składaje kala 2900 złotych, što kala 655 jeŭra, abo 2 155 rubloŭ.
Polskija mužčyny iduć na piensiju ŭ 65 hadoŭ, a žančyny — u 60 hadoŭ.
Kolki zastaniecca na žyćcio paśla apłaty kamunalnych pasłuh?
Jak bačym, siarednija piensii ŭ susiednich krainach ES značna bolšyja za tyja, što atrymlivajuć piensijaniery ŭ Biełarusi. Ale kazać, što jeŭrapiejskija piensijaniery žyvuć u 2-3 razy bolš zamožna, čym ich biełaruskija kalehi, budzie niapravilna. Jak minimum praz toje, što kamunalnyja vypłaty ŭ hetych krainach značna vyšejšyja za biełaruskija.
Tym nie mienš, navat z ulikam vialikaj kamunałki ŭ Jeŭropie, situacyja vyhladaje nie na karyść biełaruskich piensijanieraŭ. Bo kali adniać ad siaredniaj biełaruskaj piensii vydatki na kamunałku (umoŭnyja 100 rubloŭ, ci 30 jeŭra), to atrymajecca, što na žyćcio siaredniestatystyčnamu piensijanieru zastaniecca ŭsiaho 590 rubloŭ, ci kala 185 jeŭra. U toj ža čas, kali ad jeŭrapiejskaj piensii adminusavać navat 150 jeŭra na kamunałku, to atrymajecca, što na žyćcio zastajecca 425 jeŭra piensijanieru ŭ Litvie, 377 — u Łatvii i 505 — u Polščy.
Jak za 10 hadoŭ źmianilisia zarobki ŭ Biełarusi, Polščy i Litvie. Ličby susiedziaŭ uražvajuć
Minskim arandadaŭcam i nie śniłasia. Kolki biełarusy płaciać za zdymnyja kvatery ŭ Polščy i Litvie