Kultura

Tvor Uładzimira Ceślera «Biełaruski arnamient» atrymaŭ admysłovuju adznaku na Mižnarodnym bijenale płakata ŭ Varšavie

Tvor biełaruskaha dyzajniera Uładzimira Ceślera byŭ udastojeny hanarovaj zhadki («honorable mention») na 28-m Mižnarodnym bijenale płakataŭ u Varšavie. Jaho płakat pad nazvaj «Biełaruski arnamient», na jakim pakazany šmatlikija paterny z kalučaha drotu, byŭ adznačany ŭ tematyčnym konkursie, jak piša Reform.by.

Fota: fejsbuk Mižnarodnaha bijenale płakata ŭ Varšavie.

Žury prakamientavała svajo rašeńnie nastupnym čynam:

«Uładzimir Ceśler z Kipra [atrymlivaje ŭznaharodu] za płakat «Biełaruski arnamient» za, zdavałasia b, niavinnuju vyjavu tradycyjnaha majsterstva, jakaja źmiaščaje tryvožnaje schavanaje paviedamleńnie».

Nahadajem, što Uładzimir Ceśler byŭ vymušany źjechać ź Biełarusi ŭ 2020 hodzie praz pahrozu pieraśledu. Majsternia viadomaha dyzajniera ŭ tym ža hodzie była razhromlenaja siłavikami. Siońnia mastak žyvie na Kipry, a jaho tvory vystaŭlajucca pa ŭsim śviecie.

Bijenale płakataŭ u Varšavie ładzicca z 1966 hoda. Ideja ahladu takoha kštałtu, u centry jakoha — mastactva płakata, uźnikła siarod polskich hrafikaŭ i była niepasredna inicyjavana Erykam Lipińskim. Z 1990 hoda prafiesar Lech Majeŭski (ciapier prezident Mižnarodnaha bijenale płakata) zajmajecca fiestyvalem. Paśla 1994 hoda bijenale prachodziŭ u Muziei płakata ŭ Vilanuvie, kab u 2018 hodzie narešcie viarnucca na radzimu — u Akademiju pryhožych mastactvaŭ. Ahlad płakataŭ — adna z samych viadomych kulturnickich padziej u Jeŭropie.

Cyrymonija adkryćcia bijenale adbyłasia 24 červienia. Pracavać fiestyval budzie da vieraśnia 2023 hoda.

Uračystaje adkryćcio 28-ha Mižnarodnaha bijenale płakata ŭ Varšavie. Pałac Čapskich. Fota: Akademija pryhožych mastactvaŭ u Varšavie.

Čytajcie taksama:

Ceśler zhadvaje Harbačova: Prosty čałaviek, piŭ vodku, byŭ ramantykam

Ceśler padzialiŭsia, jakuju z ułasnych prac ličyć najbolš emacyjna składanaj

Kamientary da artykuła