Jeŭrapiejski sud admoviŭsia źniać sankcyi z kampanii Karyčaŭ
Jeŭrapiejski sud nie staŭ zdymać sankcyi ź biełaruskaj kampanii «Dana Astra», jakuju kantralujuć sierbskija biznesoŭcy Karyčy, piša Reform.by.
29.06.2023 / 15:55
Kvartał «Minsk-Śviet», što vyras na miescy byłoha haradskoha aeraporta. Fota: Realt.by
Kampaniju ŭklučyli ŭ sankcyjny śpis JeC u 2020 hodzie. «Dana Chołdynh» / «Dana Astra» — adzin z hałoŭnych deviełapieraŭ i zabudoŭščykaŭ u Biełarusi. Kampanija atrymała ŭčastki dla budaŭnictva niekalkich bujnych žyłych kompleksaŭ i biznes-centraŭ.
Uładalniki «Dana Chołdynh» / «Dana Astra» majuć ciesnyja suviazi z Alaksandram Łukašenkam. Lilija Łukašenka, jaho niaviestka, zajmaje vysokuju pasadu ŭ kampanii. Takim čynam, «Dana Chołdynh» / «Dana Astra» atrymlivaje vyhadu i padtrymlivaje režym Łukašenki», — kazałasia ŭ abhruntavańni pry ŭviadzieńni sankcyj.
Kampanija ličyła, što trapiła ŭ sankcyjny śpis biespadstaŭna, i patrabavała ad Rady ES skasavać pastanovu.
Jeŭrapiejski sud pastanaviŭ, što sankcyi zastajucca ŭ sile, a bok, što prajhraŭ («Dana Astra»), pavinien apłacić vydatki, paniesienyja Radaj ES padčas pracesu.
Raniej sudy ab źniaćci sankcyj prajhrali deputaty Aleh Hajdukievič, Śviatłana Lubieckaja, Alaksandr Amieljaniuk, namieśnik staršyni Biełteleradyjokampanii Siarhiej Husačenka, pieršy namieśnik ministra adukacyi Alaksandr Bachanovič, rektar BDMU Siarhiej Rubnikovič, prarektar BDEU Siarhiej Skryba.