Biełaruskija kardyjołahi asvoili novuju technałohiju dla praduchileńnia raptoŭnaj śmierci serca
Majstar-kłas pa impłantacyi całkam padskurnaj sistemy kardyaviertera-defibrylatara pacyjentu z vysokaj ryzykaj raptoŭnaj sardečnaj śmierci prajšoŭ u RNPC «Kardyjałohija». Takija apieracyi ŭ Biełarusi raniej nie vykonvalisia.
01.07.2023 / 15:37
Fota: Minzdaroŭja
Biełaruskija kardyjołahi asvoili novuju technałohiju dla praduchileńnia raptoŭnaj sardečnaj śmierci, piša BiełTA.
Majstar-kłas pa impłantacyi całkam padskurnaj sistemy kardyjaviertera-defibrylatara pacyjentu z vysokaj ryzykaj raptoŭnaj sardečnaj śmierci prajšoŭ u RNPC «Kardyjałohija». Takija apieracyi ŭ Biełarusi raniej nie vykonvalisia.
Na siońnia praapieravany pacyjent adčuvaje siabie zdavalniajuča i praciahvaje lačycca ŭ kardyjałahičnym addzialeńni centra.
Umiašańnie vykanała internacyjanalnaja bryhada chirurhaŭ: renthienendavaskularny chirurh addzieła arytmałohii centra Dźmitryj Anasovič i sardečna-asudzisty chirurh addzieła sardečna-sasudzistaj chirurhii NDI kliničnaj kardyjałohii Ministerstva achovy zdaroŭja Rasii Ihar Hryšyn.
Jak tłumačycca, impłantavanyja kardiaviertery-defibrylatary (IKD) šyroka vykarystoŭvajucca dla praduchileńnia raptoŭnaj śmierci ŭ pacyjentaŭ, jakija pieranieśli žyccieniebiaśpiečnyja arytmii abo pieražyli raptoŭnaje spynieńnie serca. Pry tradycyjnaj technałohii elektrody IKD uvodziacca niepasredna ŭ paražninu serca pacyjenta. Adnak u niekatorych kliničnych situacyjach vykarystańnie ŭnutrysardečnaha IDK procipakazana ci nie źjaŭlajecca pieravažalnym.
U hetych vypadkach lepš impłantavać padskurnuju sistemu IKD, tak jak pry znachodžańni defibrylujučaha elektroda ŭ paražninie serca jość ryzyka raźvićcia niekatorych uskładnieńniaŭ. Padskurnuju sistemu značna lahčej vydalić abo zamianić biez ryzyki niebiaśpiečnych dla žyćcia paškodžańniaŭ.
Takim čynam, u arsienale biełaruskich kardyjołahaŭ źjaviŭsia jašče adzin efiektyŭny i biaśpiečny instrumient, jaki dazvalaje praduchilić raptoŭnuju sardečnuju śmierć.