«Łancuhi sapraŭdy razarvanyja». Karol Niderłandaŭ vybačyŭsia za histaryčnuju rolu rabstva ŭ krainie
Prabačeńni pryjšli na fonie bolš šyrokaha pieraasensavańnia kałanijalnaha minułaha Niderłandaŭ, uklučajučy ŭdzieł jak u atłantyčnym handli rabami, tak i ŭ rabstvie ŭ byłych azijackich kałonijach.
02.07.2023 / 07:54
Vilem-Alaksandr. Fota: Patrick van Katwijk / Getty Images
Karol Niderłandaŭ Vilem-Alaksandr u subotu paprasiŭ prabačeńnia za histaryčnuju datyčnaść Niderłandaŭ da rabstva i za nastupstvy, jakija jano maje i siońnia, jak piša «Jeŭrapiejskaja praŭda».
Karol vystupaŭ na cyrymonii, pryśviečanaj 160-hodździu jurydyčnaj admieny rabstva ŭ Niderłandach, u tym liku ŭ byłych kałonijach u Karybskim basiejnie.
«U toj dzień, kali my ŭspaminajem hałandskuju historyju rabstva, ja prašu prabačeńnia za heta złačynstva suprać čałaviectva», — skazaŭ karol. Jon padkreśliŭ, što rasizm u hałandskim hramadstvie zastajecca prablemaj i nie ŭsie padtrymajuć jaho prabačeńni.
Adnak «časy źmianilisia, i «Keci Koci»… łancuhi sapraŭdy razarvanyja», — skazaŭ jon pad radasnyja vokličy i apładysmienty tysiač hledačoŭ la nacyjanalnaha pomnika rabstvu ŭ amsterdamskim Osterparku.
«Keci Koci» — heta surynamskija słovy, jakija aznačajuć «łancuh razarvany», i mienavita tak nazyvajuć 1 lipienia — Dzień pamiaci pra rabstva i śviatkavańni svabody.
Prabačeńni pryjšli na fonie bolš šyrokaha pieraasensavańnia kałanijalnaha minułaha Niderłandaŭ, uklučajučy ŭdzieł jak u Atłantyčnym handli rabami, tak i ŭ rabstvie ŭ byłych azijackich kałonijach.
U 2020 hodzie Vilem-Alaksandr paprasiŭ prabačeńnia ŭ Indaniezii za «praźmierny hvałt» padčas hałandskaha kałanijalnaha kiravańnia.
U śniežni premjer-ministr Mark Rute pryznaŭ, što hałandskaja dziaržava niasie adkaznaść za atłantyčny handal rabami, i paprasiŭ prabačeńnia za toje, što kraina nažyvałasia na im.
Rute zajaviŭ, što ŭrad nie budzie vypłačvać reparacyi, jak rekamiendavała kansultatyŭnaja hrupa ŭ 2021 hodzie.
U śniežni karaleŭski dom daručyŭ pravieści niezaležnaje rasśledavańnie roli karaleŭskaj siamji ŭ kałanijalnaj historyi, vyniki jakoha čakajucca ŭ 2025 hodzie.