Рэцэпт булачак, якія ніколі не чарсцвеюць — такія перадаюць палітвязням
Партал Politzek Times дзеліцца рэцэптам здобных булачак хакайда з курагой і разынкамі з цеста, якое ніколі не чарсцвее. Такія неабыякавыя беларусы перадаюць затрыманым у СІЗА.
03.07.2023 / 21:00
Для тангджонг (кісель, які робіць цеста далікатным і пухкім):
- 130 г малака
- 20 г мукі
Для цеста:
- 130 г малака
- 2-2,5 ст.л. цукру
- 30 г жывых дрожджаў (10 г сухіх)
- 400 г мукі
- 1 ч.л. солі
- 1 яйка
- 1 ст.л. смятаны
- 2 ст.л. расліннага алею
- 30 г мяккага сметанковага масла
Спачатку трэба заварыць тангджонг. У 130 г малака ўмяшаць венчыкам сталовую лыжку мукі і, пастаянна памешваючы, заварваць на пліце. Прыкрыць вечкам і ледзь астудзіць.
У 130 г цёплага малака растварыць цукар і дрожджы, умяшаць пару лыжак мукі з агульнай колькасці. Калі падымецца шапачка дрожджаў, увесці ў сумесь тангджонг, яйка, раслінны алей, смятану і соль, змяшаць і пачынаць часткамі дадаваць муку. Калі цеста перастае браць муку, вымесіць яго хвіліны 3-5 міксерам або ўручную.
Змазаць цеста сметанковым маслам і мясіць яшчэ хвіліны 3. Пакідаеце ў цяпле. Калі аб'ём павялічыцца ў 2-3 разы, цеста гатова. З гэтага цеста можна зрабіць піражкі, а можна булачкі. Рэцэпт булачак будзе ніжэй.
Булачкі хакайда з курагой і разынкамі
Раскатаць цеста ў прастакутнік, пасыпаць злёгку цукрам, рэзанай курагой, разынкамі, акуратна згарнуць у рулет, зашчыпаць падоўжны край. Перагарнуць швом уніз, разрэзаць на любую колькасць кавалкаў і выкласці на бляху пад ручнік хвілін на 40-45. Разагрэць духоўку да 190° на рэжыме ўверх-уніз. Змазаць булачкі сумессю жаўтка напалову з малаком і запякаць 20-25 хвілін. Гатоўнасць вызначаецца па колеры. Дастаць, прыкрыць ручніком, каб скарыначка была мяккай.
Калі вы любіце булачкі з карыцай, да 2 ст.л. цукру трэба дадаць чайную лыжку карыцы і пасыпаць раскатанае цеста гэтай сумессю.
І яшчэ з гэтага цеста атрымліваюцца і смажаныя, і печаныя піражкі аднолькава добра. Начынне можа быць любым.