Prapahanda raskazała pra zatrymańni ŭ Połackim univiersitecie i pakazała zapłakanych supracoŭnic
Na telekanale «Źviezda» vypuścili prapahandyscki siužet pra Połacki dziaržaŭny ŭniviersitet. Ź jaho stanovicca zrazumiełym, za što zatrymali niekatorych rabotnikaŭ. Čystkami pryhrazili i inšym univiersitetam.
05.07.2023 / 10:24
Zatrymańnie adnaho z rabotnikaŭ PDU. Skryn siužeta telekanała «Źviezda»
23 maja ŭ Połackim dziaržaŭnym univiersitecie prajšła chvala zatrymańniaŭ, pad jakuju trapiła kala paŭtara dziasiatka supracoŭnikaŭ. Bolšaści tych, čyje vyniki suda viadomyja, prysudzili aryšt, minimum adzin čałaviek aštrafavany.
14 červienia «pa pahadnieńni bakoŭ» zvolnienyja raniej aryštavanyja pa administracyjnych spravach dacent kafiedry historyi i turyzmu Viktar Čaraŭka i dacent kafiedry kanstytucyjnaha prava i dziaržkiravańnia Siarhiej Hłazyryn. Ahułam u minułym miesiacy zvolnili nie mienš za siem supracoŭnikaŭ.
Hłazyryn u siužecie raskazaŭ, što trapiŭ na sutki za staroje fota va «UKantakcie» na fonie bieł-čyrvona-biełaha ściaha.
Pakazali i dźviuch zapłakanych rabotnic, jakich raniej sudzili za padpiski na niepažadanyja resursy: asistentku kafiedry technałohii i abstalavańnia pierapracoŭki nafty i haza Palinu Putro (joj tady dali štraf u 740 rubloŭ) i namieśnicu dekana pa vychavaŭčaj pracy fakulteta infarmacyjnych technałohij Maryju Dekanavu.
Palina Putro. Skryn siužeta telekanała «Źviezda»
U siužecie narakali, što mnohija supracoŭniki PDU stvarali telehram-kanały, dzie vykazvali svajo mierkavańnie, udzielničali ŭ akcyjach i niekatoryja sprabujuć ciapier «adsiedziecca».
«Soram i bol za niekampietentnaść kadraŭ», — zajaviła prapahandystka.
Jana aburyłasia, što eks-rektar PDU, prafiesar Dźmitryj Łazoŭski, nie zabaraniaŭ va ŭniviersitecie łozunhi pra svabodu i demakratatyju. Jon pierastaŭ być rektaram u 2021-m. U siužecie jon nie staŭ havaryć z prapahandystami.
Ciapierašni rektar PDU Juryj Ramanoŭski zaŭvažyŭ:
«Pytańni mnohija, źviazanyja ź dziejnaściu tych ci inšych struktur, tych ci inšych vykładčykaŭ, rabotnikaŭ, jakija ŭ 2020 hodzie padtrymali pratesnuju dziejnaść, padtrymali tak zvanuju svabodu słova, na žal, abo zamoŭčvalisia, abo na heta nie źviartałasia ŭvahi».
Jon pryznaŭsia, što bolšaja častka supracoŭnikaŭ «padtrymała pratesnuju dziejnaść, nie pieraškadžała tamu, kab studentaŭ nie dałučali».
«Častka rabotnikaŭ była źviazanaja z zamiežžam, jany sabie, pa sutnaści, na hetych prajektnych akcyjach zrabili peŭny chajp dla taho, kab potym u ramkach padtrymki mieć jakija-niebudź dyvidendy», — vykazaŭsia Juryj Ramanoŭski.
U kancy siužeta prapahandystka zajaviła, što PDU — miesca nie dla «pieramien» (jana padkreślena vymaviła słova pa-biełarusku), a «pieriemien».
Jana dadała, što pratesnyja nastroi byli nie tolki ŭ hetym univiersitecie Viciebščyny.
«Dumać, što vas nie zakranie, — samanadziejnaść i hłupstva. Dumaju, tam, dzie treba, moj pasył pačuty», — pryhraziła jana.
Čytajcie taksama:
Rektar Połackaha ŭniviersiteta pryznaŭ, što bolšaść vykładčykaŭ u 2020-m padtrymali pratesty
73-hadovuju kandydatku techničnych navuk aryštavali na 10 sutak
Połackaha dziaržuniviersiteta zvolnili nie mienš za ciem supracoŭnikaŭ