Stali viadomyja padrabiaznaści trahičnaj śmierci 22-hadovaha biełarusa ŭ polskich Tatrach
Z 4 lipienia ŭ Polščy vialisia pošuki biełarusa Źmitra Kraŭcova, na nastupny dzień vałanciory paviedamili, što znajšli cieła chłopca biez prykmiet žyćcia.
06.07.2023 / 15:26
Źmicier Kraŭcoŭ. Fota: fejsbuk
Biełarus Źmicier Kraŭcoŭ pamior, upaŭšy sa skały ŭ polskich Tatrach. Hornyja ratavalniki raskazali padrabiaznaści jahonaj śmierci, pra jakuju stała viadoma 5 lipienia, piša «Radyjo Svaboda».
Źmitru Kraŭcovu było 22 hady. Jon pierajechaŭ u Polšču niadaŭna i pasialiŭsia ŭ Krakavie. Chłopiec sprabavaŭ znajści pracu ŭ restarannaj śfiery.
U paniadziełak, 3 lipienia, Źmicier u adzinočku vypraviŭsia ŭ hory. U apošniaj razmovie ź blizkimi jon nazvaŭ try mahčymyja maršruty, pa jakich pojdzie. Svoj vybar chłopiec zrabiŭ paźniej i nikomu pra jaho nie paviedamiŭ. Jon pakinuŭ mašynu na turystyčnym parkinhu i nakiravaŭsia na haru Rysy (2501 mietr), jakaja znachodzicca na miažy sa Słavakijaj, nad samym papularnym turystyčnym abjektam rehijona — vozieram Marskoje Voka.
Kali da ranicy aŭtorka Źmicier tak i nie viarnuŭsia i navat nie vyjšaŭ na suviaź, jahonaja znajomaja źviazałasia z ekstrannymi słužbami.
Tatranskaja vałanciorskaja vyratavalnaja słužba atrymała paviedamleńnie ab źniknieńni biełarusa ŭ 9:30 i apieratyŭna pačała pošuki. Vyśvietliŭšy, što chłopiec pryparkavaŭsia la pačatku maršrutu na Marskoje Voka i haru Rysy, ratavalniki skancentravali namahańni mienavita tam. Zadziejničali viertalot i drony z kamierami.
Intensiŭnyja pošuki skončylisia dniom u sieradu. Ratavalniki znajšli Źmitra Kraŭcova niežyvym na vyšyni bolš za 2000 mietraŭ, pobač z trasaj padjomu na haru Rysy, u rajonie skalnaha vystupu Bula pod Rysami.
U hetym miescy vielmi stromki schił, sarvacca ź jakoha lohka ŭ lubuju paru hoda, paśliznuŭšysia na drobnych kamianiach abo mokraj ad daždžu skale. A ciapier na ściežcy, jak paćvierdzili ŭ kamientarach da publikacyi alpinisty, jakija niadaŭna prachodzili tam, usio jašče zastajecca abledzianieły śnieh, jaki robić uzychodžańnie asabliva ryzykoŭnym.
«U vyniku padzieńnia z vyšyni małady turyst atrymaŭ śmiarotnyja paškodžańni. Ratavalniki viertalotam transpartavali cieła ŭ Zakapane», — paviedamlaje TORP.
***
Rysy — heta samaja vysokaja viaršynia Polščy i samaja niebiaśpiečnaja hara polskich Tatraŭ.
Sa słavackaha boku padjom na jaje spadzisty i biesprablemny, a voś z polskaha boku hara ŭjaŭlaje saboj amal ścianu, i trasa ŭzdymu na viaršyniu tam składanaja i niebiaśpiečnaja, patrabuje śpiecyjalnaha abstalavańnia i navykaŭ.
Tym nie mienš jana vielmi papularnaja, i pieryjadyčna turysty tam hinuć.