Vučonyja: praźmiernaje spažyvańnie ultraapracavanych praduktaŭ moža vyklikać psichičnyja razłady
Ultraapracavanyja pradukty charčavańnia vyrablajucca z rafinavanych i maksimalna ačyščanych ad damieškaŭ inhredyjentaŭ. U śpis takich praduktaŭ uvachodziać čypsy, šakaładnyja batončyki, piečyva, kurynyja nahietsy, multyfruktovyja soki i navat marožanaje. Novyja daśledavańni paćviardžajuć suviaź hetych praduktaŭ z recydyvami depresiŭnych sindromaŭ.
07.07.2023 / 17:00
Ultraapracavanyja pradukty mohuć być vielmi dalokija ad syraviny, ź jakoj jany vyrablenyja. Ich atrymańnie patrabuje značnych fizičnych, chimičnych ci bijałahičnych pieraŭtvareńniaŭ, a taksama takich dadatkaŭ, jak emulhatary, uzmacnialniki smaku ci antyaksidanty. Usio heta źmianiaje teksturu, smak i termin prydatnaści praduktu.
Navukoŭcy daŭno havorać pra toje, što ultraapracavanyja pradukty charčavańnia pavyšajuć ryzyku raźvićcia cukrovaha dyjabietu 2 typu, sardečna-sasudzistych zachvorvańniaŭ, atłuścieńnia i navat raku. Novaje daśledavańnie vyjaviła suviaź pamiž praźmiernym spažyvańniem takich praduktaŭ i ryzykaju recydyvaŭ depresii.
Pra heta paviedamlaje Nacyjanalny instytut zdaroŭja i miedycynskich daśledavańniaŭ Francyi. Kamanda vučonych Centra daśledavańniaŭ epidemijałohii i zdaroŭja nasielnictva ŭ Paryžy vyvučała suviaź pamiž charčavańniem i psichičnym zdaroŭjem na praciahu piatnaccaci hadoŭ.
Kamanda vykarystoŭvała danyja brytanskich dziaržaŭnych słužboŭcaŭ va ŭzroście ad 35 da 55 hadoŭ, jakija pačali svaju pracu ŭ pieryjad z 1985 pa 1988 hod. Depresiŭnyja simptomy ŭdzielnikaŭ daśledavańnia i mahčymaje vykarystańnie imi antydepresantaŭ aceńvalisia čatyry razy z 2002 pa 2016 hod. Ahułam byli praanalizavanyja danyja 4554 čałaviek (u tym liku 74% mužčyn).
Ježa, jakuju spažyvali ŭdzielniki daśledavańnia ŭ pieryjad z 1991 pa 2004 hod, aceńvałasia na asnovie ankiety, jakaja samastojna zapaŭniałasia ŭdzielnikami i jakaja praduhledžvała kłasifikacyju praduktaŭ u zaležnaści ad stupieni ich apracoŭki.
Dla kožnaha ŭdzielnika daśledčyki raźličyli dolu ultraapracavanych praduktaŭ u dzionnym spažyvańni. Na padstavie hetych danych usie ŭdzielniki byli padzielenyja na piać hrup.
Daśledčyki vyjavili značnuju suviaź pamiž vysokim spažyvańniem praduktaŭ, jakija prajšli praz hłybokuju apracoŭku, i ryzykaj recydyvu depresiŭnych simptomaŭ.
Udzielniki daśledavańnia, u racyjonie jakich ultraapracavanyja pradukty składali adnu treciuju častku racyjonu, byli na 30% bolš schilnyja da epizodaŭ recydyvu depresiŭnych simptomaŭ u paraŭnańni z udzielnikami, u jakich dola takich praduktaŭ u štodzionnym spažyvańni składała mienš za adnu piatuju.
Vučonyja adznačajuć, što takaja ŭzajemasuviaź nie zaležyć ad sacyjalna-demahrafičnych faktaraŭ, ładu žyćcia abo ahulnaha stanu zdaroŭja ludziej. Ich analiz pakazaŭ, što ŭlik doli ultraapracavanych praduktaŭ u racyjonie charčavańnia pryvodzić da istotnaha pasłableńnia suviazi pamiž jakaściu charčavańnia čałavieka i ryzykaj uźniknieńnia ŭ jaho depresiŭnych simptomaŭ.
Vučonyja tłumačać heta tym, što ultraapracavanyja pradukty sadziejničajuć akiślalnamu stresu, vyklikajuć źmieny kišečnaj mikrabijoty i navat ekspresiju hienaŭ. Usio heta akazvaje ŭpłyŭ na psichičnaje zdaroŭje čałavieka.
Vučonyja adznačajuć, što atrymanyja imi vyniki padkreślivajuć, nakolki važna źviartać uvahu na spažyvańnie praduktaŭ hłybokaj apracoŭki, i nahadvajuć, što daktary nastojliva rajać užyvać pradukty ŭ ich jak maha bolš naturalnym vyhladzie, siarod jakich abaviazkova pavinny prysutničać sadavina, miasa, ryba, muka hrubaha pamołu i h. d.
Čytajcie jašče:
Jarkija cukierki, marožanaje i sałodkija johurty. Kali vy ich jaście, vaźmiciesia za hałavu