Samit NATA adydzie ad farmulovak «Bucharesta» ŭ pytańni siabroŭstva Ukrainy — ambasadarka ZŠA
Lidary krain Paŭnočnaatłantyčnaha aljansu ŭ zajavie pa vynikach samitu ŭ Vilni na nastupnym tydni buduć imknucca adyści ad farmulovak Bucharesckaha samitu 2008 hoda, čaho Ukraina doŭhi čas patrabuje. Pra heta na bryfinhu dla žurnalistaŭ u piatnicu zajaviła ambasadarka Złučanych Štataŭ pry NATA Džulijan Śmit, paviedamlaje «Jeŭrapiejskaja praŭda».
07.07.2023 / 21:38
Fota: AP Photo / Virginia Mayo
Pa słovach amierykanskaj dypłamatki, Ukraina moža čakać ad samitu NATA «nabor kankretnych vynikaŭ, jak z punktu hledžańnia doŭhaterminovaj praktyčnaj dapamohi ŭ takich pytańniach, jak vajskovaja madernizacyja, tak i ŭ pytańniach apieratyŭnaj sumiaščalnaści».
«U kamiunikie my budziem kazać pra imknieńnie Ukrainy da siabroŭstva [ŭ NATA], i heta toje, nad čym čalcy Aljansu praciahvajuć pracavać. Ale heta nie prosta paŭtareńnie Bucharesckaha samitu, heta budzie inakš, čym toje, pra što my kazali ŭ 2008 hodzie», — padkreśliła Śmit.
Jana ŭdakładniła, što kankretnyja farmuloŭki jašče ŭzhadniajucca dziaržavami — siabroŭkami NATA i, chutčej za ŭsio, stanuć viadomyja ŭ kancy tydnia.
U toj ža čas Džulijan Śmin paviedamiła, što abmiarkoŭvajecca i pytańnie admieny abaviazkovaha Płana dziejańniaŭ pa siabroŭstvie (PDS) dla Kijeva.
«Ale ja liču, što prezident Zialenski, kali jon navažycca pryjechać na samit, atrymaje dobry pryjom, ubačyć značnuju padtrymku Ukrainy z Aljansam i budzie mieć ceły nabor kankretnych dasiahnieńniaŭ, jakija buduć śviedčyć ab doŭhaterminovaj prychilnaści da Ukrainy z boku Aljansu», — adznačyła dypłamatka.
Jak viadoma, na Bucharesckim samicie NATA 2008 hoda Hiermanija i Francyja zabłakavali vydaču Ukrainie i Hruzii Płana dziejańniaŭ dla siabroŭstva ŭ NATA, bajučysia eskałacyi z boku Rasii. Z tych časoŭ abiedźvium hetym krainam Aljans tolki abiacaŭ «u niejki dzień» ustupleńnie ŭ NATA.
Čytajcie taksama:
Stołtenbierh ahučyŭ rašeńni, jakija samit NATO prymie ŭ dačynieńni da Ukrainy
Zialenski pryjedzie na samit NATO ŭ Vilniu
Hramadskija dziejačy zaklikali biełarusaŭ vyviesić nacyjanalnyja ściahi ŭ Vilni na čas samitu NATO