Naŭsieda zaklikaŭ NATO zabycca pra akt ab supracoŭnictvie z Rasijaj i stvaryć bazy la jaje miežaŭ
Prezident Litvy adznačyŭ, što paśla pačatku poŭnamaštabnaha ŭvarvańnia Rasii va Ukrainu čalcy Aljansu ŭśviadomili nieabchodnaść pavyšać vydatki na abaronu.
11.07.2023 / 07:16
Premjer-ministr Luksiemburha Ksaŭje Bietel, prezident Jeŭrakamisii Ursuła fon der Lajen i Hitanas Naŭsieda vitajucca z prezidentam Francyi Emaniuelem Makronam. Vilnia, 10 lipienia 2023 hoda. Fota: Thierry Monasse / Getty Images
NATA pryjšoŭ čas pryznać padpisany ŭ 1997 hodzie asnovatvorny akt ab adnosinach i supracoŭnictvie pamiž Aljansam i Maskvoj niesapraŭdnym i stvaryć pastajannyja vajskovyja bazy la miežaŭ Rasii. Z takim zaklikam u intervju haziecie The Times, apublikavanym u paniadziełak, vystupiŭ prezident Litvy Hitanas Naŭsieda.
«Kali Rasija aktyŭna raźmiaščaje taktyčnuju jadziernuju zbroju ŭ Biełarusi, a ŭ nas jość usie dokazy taho, što heta adbyvajecca, my pavinny ŭžo narešcie pryznać, što asnovatvorny akt Rasija — NATA miortvy. U adsutnaść hetaha kroku jon pa-raniejšamu pieraškadžaje ćviaroza dumać šmatlikim stalicam [krain NATA] i trymaje nas u šeraj zonie stratehičnaj dvuchsensoŭnaści», — zajaviŭ jon, zvažajučy na toje, što akt praduhledžvaje nieraźmiaščeńnie na terytoryi novych členaŭ Aljansu jadziernaj zbroi i istotnych bajavych sił na pastajannaj asnovie.
Prezident Litvy padkreśliŭ, što paśla pačatku vajny va Ukrainie čalcy Aljansu ŭśviadomili nieabchodnaść pavyšać vydatki na abaronu.
Zakranajučy pytańnie ab ustupleńni Ukrainy ŭ NATA, Naŭsieda skazaŭ, što było b pamyłkaj paŭtarać na samicie ŭ Vilni, jaki adkryvajecca siońnia, tyja ž farmuloŭki, što prahučali na samicie ŭ Buchareście ŭ 2008 hodzie. Pavodle jaho słoŭ, arhanizacyi varta paznačyć «najbolš jasny i karotki šlach dla ŭstupleńnia Ukrainy», što padniało b bajavy duch USU, adnak jon pryznaŭ, što siabroŭstva dla Kijeva» niemahčyma na praktycy, pakul kraina viadzie vajnu».
«Viadoma ž, nielha prosta ŭklučyć hetuju krainu ŭ skład [Aljansu], bo tady nam daviadziecca kazać pra piaty artykuł (damovy ab NATA, kali napad na krainu — čalca NATA pryraŭnoŭvajecca da napadu na ŭvieś Aljans — «NN»). Heta niemahčyma, ale naša zaduma — pasłać sihnał ab tym, jak možna budzie dziejničać, kali vajna skončycca i ŭmovy buduć dazvalać», — dadaŭ jon.