U vypadku nieabchodnaści NATA pierakinie ŭ Polšču sto tysiač sałdat — Duda
Prezident Polščy pa zakančeńni samitu Paŭnočnaatłantyčnaha aljansu ŭ Vilni zrabiŭ zajavu, što isnuje damoŭlenaść ab tym, što ŭ vypadku nieabchodnaści na terytoryju Polščy pierakinuć 100 tysiač sałdataŭ NATA.
13.07.2023 / 07:05
Andžej Duda padčas samitu NATA ŭ Vilni. 11 lipienia 2023 hoda. Paul Ellis/Pool Photo via AP
«Miarkujecca, što kali b adbyłasia ataka na Bieraściejskuju bramu, možna było b raźličvać, što kala 100 tysiačaŭ sałdataŭ Aljansu byli b skiravanyja na našu terytoryju dla nieadkładnaj abarony», — cytuje słovy Andžeja Dudy «Biełsat».
Jon dadaŭ, što heta pryncypy, jakija ciapier prymajucca i zaćviardžajucca Aljansam u ramkach jaho abarončych płanaŭ.
Andžej Duda padkreśliŭ, što ŭ vynikovym kamiunikie Biełaruś zhadvałasia piać razoŭ, z asablivym akcentam na tak zvanaj Bieraściejskaj bramie, jak zonie stratehičnaj i vajennaj pahrozy, jakaja budzie znachodzicca pad asablivym nahladam NATA.
Adnačasova prezident Polščy adznačyŭ, što ciapier adbyvajecca źmiena rytoryki Aljansu ŭ dačynieńni da Rasii. «Rasija pierastała być absalutna ŭ jakoj-kolviek stupieni partnioram NATA, ciaham mnohich hadoŭ jana nazyvałasia partnioram NATA, ciaham mnohich hadoŭ byli sajuźnikami, jakija rašuča vystupali za ŭklučeńnie nazvy Rasii jak partniora NATA ŭ dakumienty Aljansu».
Ale pry hetym Andžej Duda padkreśliŭ, što siońnia niama nijakich sumnieńniaŭ u tym, što Rasija — ahresar, Rasija siońnia — samaja vialikaja pahroza dla krain NATA, jana viadzie ahresiŭnuju vajnu va Ukrainie, ahresaram jaje nazyvaje i Paŭnočnaatłantyčny aljans.