На поўдні Еўропы прагназуецца нечуваная спёка. Месцамі +48,8°C
У еўрапейскіх краінах на ўзбярэжжы Міжземнага мора пачынаецца самая вялікая спёка за лета 2023 года. Пра гэта паведамляе Бі-бі-сі.
13.07.2023 / 08:54
Спёка ў Румыніі ўжо дасягнула +40°C. Фота: AP Photo/Andreea Alexandru
Хваля спёкі, якую празвалі «Цэрберам», накрые часткі Іспаніі, Францыі, Італіі, Грэцыі, Харватыі і Турцыі. Тэмпература паветра чакана перавысіць 40°C, а ў Італіі месцамі дапускаюць нават 48.8°C.
У наступныя дні ў многіх месцах могуць зарэгістраваць новыя тэмпературныя максімумы.
Для дзесяці італьянскіх гарадоў, уключаючы Рым і Фларэнцыю, з-за спёкі абвясцілі чырвонае папярэджанне.
Экстрэмальная спёка ў краіне ўскосна ўжо стала прычынай смерці аднаго чалавека — у горадзе Лодзі пад Міланам ад цеплавога ўдару страціў прытомнасць 44-гадовы рабочы, які наносіў дарожную разметку. Мужчына пасля памёр у бальніцы. Паведамлялі таксама аб некалькіх турыстах, якія страцілі прытомнасць праз спёку.
Тэмпературным максімумам для Еўропы застаецца паказчык 48.8°C, які зарэгістравалі ў жніўні 2021 года каля горада Сіракузы на італьянскай Сіцыліі.
Паводле ацэнак спецыялістаў, падчас рэкордна гарачага для Еўропы лета мінулага года з-за спёкі загінулі больш за 61 тысячы чалавек.
Даследаванні паказваюць, што ў працэсе змены клімату Еўропа награваецца ўдвая хутчэй, чым у сярэднім іншыя рэгіёны свету.
Чытайце таксама:
3 ліпеня стаў самым гарачым днём на планеце ў гісторыі назіранняў