З'явілася калекцыя ўпрыгожванняў, грошы ад продажу якой пойдуць на падтрымку палітвязняў
Каманда праекта Politvyazynka запусціла калекцыю аксесуараў, усе сродкі ад продажу якой пойдуць на дапамогу жанчынам, асуджаным па палітычных артыкулах.
14.07.2023 / 11:50
«Падчас паўстання Каліноўскага падрымка палітзняволеных выяўлялася і ў модзе. Жанчыны ў падтрымку палітвязняў насілі жалобныя адзенні, а яшчэ з'явілася цэлая лінія ўпрыгожанняў: бранзалеты з сэрцам і якарам, завушніцы, каралі, пярсцёнкі, брошкі», — рассказвае Яўгенія Доўгая, стваральніца ініцыятывы «Палітвязынкі».
Даведаўшыся пра гэты факт, знаёмая дызайнерка дзяўчыны, якая таксама пацярпела ад палітычных рэпрэсій, прапанавала зрабіць падобную калекцыю. Актывістка кажа, што значна дапамаглі ў гэтым артыкулы журналіста Алеся Кіркевіча і гісторыка Васіля Герасімчыка — абодва шмат пісалі пра паўстанне Каліноўскага і партнёркі натхняліся апісанымі там гісторыямі.
За аснову матэрыялаў узялі метал і жэмчуг. Яўгенія дзеліцца: «З металам звязана многае турэмнае — краты, кайданкі. А жамчужыны — гэта пра нешта тонкае і прыгожае».
Фота: інстаграм «Палітвязынкі»
Усе вырабы выкананы ўручную і нясуць глыбокі сэнс. Калі прыгледзецца да некаторых упрыгожанняў, напрыклад, да жамчужнага чокера, можна разглядзець, што пацеры на ім размешчаны паводле азбукі Морзэ і складаюцца ў надпіс «Жыве Беларусь».
Фота: інстаграм «Палітвязынкі»
Прыцягваюць увагу і завушніцы «Цюльпаны» — дзяўчаты ўклалі ў іх памяць аб жаночых акцыях салідарнасці, якія праходзілі ў Мінску ў 2020 годзе. Але, паколькі калекцыя адлюстроўвае беларускую рэчаiснасць, было вырашана дадаць незвычайныя зашпількі, якiя нагадваюць кайданкі.
Фота: інстаграм «Палітвязынкі»
Акрамя таго, у калекцыі прадстаўлены разнастайныя бранзалеты і калье. Усе сродкі ад продажу аксесуараў будуць накіраваныя на дапамогу палітзняволенным жанчынам. Набыць упрыгожванні можна ў інстаграме праекта. Для зручнасці пакупнікоў дзяўчаты арганізавалі міжнародную дастаўку.