Karpiankoŭ pra novyja atrady śpiecnaza: My budziem vykarystoŭvać bahaty dośvied NKVD
Namieśnik ministra ŭnutranych spraŭ — kamandujučy ŭnutranymi vojskami Mikałaj Karpiankoŭ učora prainśpiektavaŭ abstalavańnie i hatoŭnaść novaha padraździaleńnia śpiecyjalnaha pryznačeńnia «Buran» u Homieli, stvoranaha na bazie vajskovaj čaści 5525.
15.07.2023 / 09:06
Mikałaj Karpiankoŭ. Skrynšot videa
Za adpracoŭkaj umoŭnych situacyj na roznych łakacyjach sačyli taksama staršynia Homielskaha abłvykankama Ivan Krupko, načalnik UUS Alaksandr Šastajła, vajskovy kamisar vobłaści Andrej Kryvanosaŭ i inšyja, jak paviedamlaje Homielski abłvykankam.
«My ich stvarali dla ŭzmacnieńnia našych bajavych mahčymaściaŭ, pierš za ŭsio dla taho, kab jany byli hatovyja i zdolnyja vieści sučasnyja bajavyja dziejańni, mahli vysočvać i źniščać dyviersijna-vyviedvalnyja hrupy i niezakonnyja ŭzbrojenyja farmavańni, jakija da nas siudy niepasredna mohuć uvarvacca», — raskazaŭ Karpiankoŭ.
«My starajemsia realizavać toj unikalny bahaty dośvied, jaki jość u padraździaleńniach NKVD, kali jany vyjaŭlali dyviersantaŭ, palicajaŭ, kałabarantaŭ, jakija chavalisia ŭ našych lasach. Našy padraździaleńni zdolnyja vykonvać zadaču i ŭ cyvilnym adzieńni, vysočvajučy, i ŭ ciažkim abmundziravańni, pravodziačy vajskovyja śpiecapieracyi. Takija hrupy, jany nazyvalisia čekiscka-vajskovyja. Heta voś mienavita ŭ ciesnym uzajemadziejańni z kryminalnaj milicyjaj my padrychtujem padraździaleńni, jakija buduć u sabie spałučać voś hety dośvied čekiscka-vajskovych hrup», — praciahnuŭ namieśnik ministra.
Vajenkam Andrej Kryvanosaŭ, Ivan Krupko, Alaksandr Šastajła, Mikałaj Karpiankoŭ. Fota: Homielski abłvykankam
Učora była razyhrana nastupnaja scenka. Dvoje złačyncaŭ zachapiła žyły dom i ŭziało ŭ zakładniki miascovych žycharoŭ. Bajcy adpracavali śpiecapieracyju z zachopam u aŭtamabili hrupy dyviersantaŭ, evakuacyju paranienaha tavaryša i inšyja taktyčnyja zadańni.
«Šancaŭ u voraha niama», — daŭ acenku Mikałaj Karpiankoŭ.
Čytajcie taksama:
Karpiankoŭ zajaviŭ, što hatovy pačać palavańnie na połk Kalinoŭskaha