Polski lekar sprabavaŭ ciškom vynieści bijałahičny materyjał Saakašvili — hruzinskija ŭłady
Ministerstva justycyi i pienitencyjarnaja słužba Hruzii apublikavali videa, na jakim achoŭniki ŭstanovy, dzie ŭtrymlivajecca były prezident Hruzii, prymusili polskaha lekara dastać sa svajho čaravika skrutak z analizam.
15.07.2023 / 15:34
Frahmient videa, apublikavanaha hruzinskimi ŭładami, na jakim adlustravanaja nibyta sproba polskaha lekara vynieści ŭ čaraviku skrutak z analizam byłoha prezidenta Hruzii Michaiła Saakašvili. Krynica: staronka ŭ fejsbuku pienitencyjarnaj słužby Hruzii
Pa aficyjnych paviedamleńniach hruzinskich uładaŭ, adzin ź lekaraŭ polskaj miedycynskaj hrupy, dapuščanaj da abśledavańnia byłoha prezidenta Hruzii Michaiła Saakašvili, sprabavaŭ tajemna vynieści jaho bijałahičny materyjał na volu z režymnaj ustanovy. Pra heta 14 lipienia napisała vydańnie NewsGeorgia.
U jakaści dokazaŭ Ministerstva justycyi i pienitencyjarnaja słužba Hruzii apublikavali videa, na jakim polski lekar u prysutnaści hruzinskich achoŭnikaŭ dastaje sa svajho čaravika skrutak ź nibyta bijałahičnym materyjałam Saakašvili.
Pavodle śćviardžeńniaŭ uładaŭ, sam incydent «niezrazumieły», bo ŭ polskaj miedycynskaj hrupy «ŭžo byli aficyjnyja dazvoły na vyvaz analizaŭ».
«Zhadanaje dziejańnie z boku polskaha doktara dadaje jašče bolšaj dvuchsensoŭnaści i niezrazumiełaści, što niesumiaščalna z etyčnymi i pravavymi normami. Heta nie paddajecca łohicy, bo z našaha boku byŭ dadzieny dazvoł na vyvaz «uzoraŭ» vałasoŭ i paznohciaŭ, jakija polskija lekary ŭžo zabrali raniej», — zajaviła pienitencyjarnaja słužba Hruzii na svajoj aficyjnaj fejsbuk-staroncy.
Skrynšot videa pienitencyjarnaj słužby Hruzii
Jak paviedamiła NewsGeorgia, u suviazi sa zdareńniem Ministerstva justycyi Hruzii prapanavała MZS krainy zapatrabavać u ambasady Polščy tłumačeńnia dziejańniaŭ polskaha lekara.
Taksama było vykazana mierkavańnie, što nastupny raz prośby naviedać Saakašvili z boku zamiežnych lekaraŭ buduć adchilenyja.
Nahadajem, što były prezident Hruzii Michaił Saakašvili jašče z 2021 hoda znachodzicca pad vartaj u siabie na radzimie. U hety momant jaho ŭtrymlivajuć u śpiecyjalnaj miedycynskaj klinicy «Vivamied», pavodle fota ź jakoj zdaroŭje i vyhlad palityka stali ašałamlalna žachlivymi.
Tak jak Saakašvili maje dziejnaje ŭkrainskaje hramadzianstva, ułady Ukrainy ŭžo niekalki razoŭ zaklikali Hruziju pieradać palityka im.
Čytajcie taksama:
Saakašvili rassakreciŭ poł i imia svajho čaćviortaha dziciaci
Ukrainskija pamiežniki adsočvajuć pieramiaščeńni vahnieraŭcaŭ u Biełarusi