Za «złosnaje niepadparadkavańnie» administracyi kałonii žłobincu dadali jašče paŭhoda źniavoleńnia
Jašče adnaho palitviaźnia asudzili pa artykule za «złosnaje niepadparadkavańnie administracyi papraŭčaj ustanovy» (č. 1 art. 411 Kryminalnaha kodeksa). Ciapier takim sposabam termin znachodžańnia za kratami pavialičyli Jaŭhienu Zaščytavu sa Žłobina, jaki adbyvaje pakarańnie va ŭmovach strohaha režymu, piša «Viasna».
18.07.2023 / 10:28
U dadatak da terminu, na jaki Jaŭhien Zaščytaŭ byŭ asudžany raniej, suddzia suda Leninskaha rajona Mahilova Viktoryja Palakova 13 lipienia prysudziła jamu jašče šeść miesiacaŭ pazbaŭleńnia voli.
Ciapier ahulny termin, na jaki asudžany Zaščytaŭ, — try hady i šeść miesiacaŭ.
Jaŭhien Zaščytaŭ spačatku byŭ asudžany 2 krasavika 2021 h. sudom Žłobinskaha rajona, jaki prysudziŭ jamu try hady pazbaŭleńnia voli ŭ kałonii ahulnaha režymu pa art. 364 KK (hvałt abo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ). Pryčynaj stała akcyja pratestu, jakaja adbyłasia ŭ Žłobinie 9 — 10 žniŭnia 2020 h. paśla prezidenckich vybaraŭ. Spravu viała suddzia Natalla Kačałava.
U červieni 2022 hoda Jaŭhienu źmianili režym adbyvańnia na turemny. Pierad hetym Zaščytava pakarali 70 sutkami štrafnoha izalatara, a potym jon jašče na dva miesiacy byŭ pieraviedzieny ŭ pamiaškańnie kamiernaha typu.