Вугляродная ўгода Беларусі ў Афрыцы зрываецца
Ідэя Беларусі прадаць афрыканскім краінам квоты на вугляродныя выкіды, здаецца, пацярпела крах. Афрыканскі рынак добраахвотных вугляродных крэдытаў заявіў, што гандлюе толькі кампенсацыямі, якія прадстаўляюцца краінамі Афрыкі, піша Reform.by са спасылкай на Bloomberg.
19.07.2023 / 10:49
Фота: @DZumaSambudla / Twitter
Біржа «будзе гандляваць на сваёй платформе вугляроднымі крэдытамі, якія адбываюцца з краін афрыканскага кантынента, але не з іншых юрысдыкцый», — заявіў Кванеле Хлабангана, кіраўнік афрыканскага рынку добраахвотных вугляродных крэдытаў (AVCCM). Ён таксама дадаў, што замежныя СМІ «паспрабавалі ўцягнуць нашу арганізацыю ў геапалітыку».
На кліматычнай канферэнцыі ў Зімбабвэ ў пачатку ліпеня экс-прэзідэнт ПАР Джэйкаб Зума выступіў ад імя беларуска-афрыканскай гандлёвай асацыяцыі (BAFTA) і прапанаваў афрыканскім краінам квоты на вугляродныя выкіды. 2 млн «вугляродных кампенсацый» павінны былі быць выстаўленыя на новай біржы AVCCM, якая ствараецца ў Зімбабвэ. Беларускі бок пазней заявіў, што прапануе крэдыты лясной праграмы «Сібір».
У каментары выданню прадстаўнік BAFTA заявіў, што арганізацыя паважае камерцыйнае рашэнне AVCCM. «Што тычыцца Зімбабвэ, наша прапанова і намер застаецца ў сіле», — заявілі ў BAFTA.