«Čakali, što aktyvizujucca rasijskija inviestary, ale Minsk im nie patrebny». Što adbyvajecca na rynku ofisaŭ
U ekspłuatacyju ŭviali niekalki novych budynkaŭ, arandatary pierajazdžajuć u bolš kampaktnyja pamiaškańni, ale ceny istotna nie źnižajucca. Što adbyvałasia na ofisnym rynku ŭ apošnija miesiacy, raskazvaje Office Life.
19.07.2023 / 11:57
Biznes-centr «Sucharava». Fota: prometr.by
Što z prapanavańniem?
Prapanavańnie na rynku arendnych płoščaŭ u apošnija paŭhoda trochi vyrasła za košt uvodu ŭ ekspłuatacyju troch ofisnych abjektaŭ, jak kaža vykanaŭčy dyrektar NAI Belarus Andrej Aleškin. Havorka idzie pra MFK Helen Valery Plaza ź vidam na vadaschovišča Drazdy, hramadska-administracyjny centr «Levada» ŭ adnajmiennym žyłym kompleksie, a taksama biznes-centr «Sucharava» na vuł. Hareckaha.
U stadyi realizacyi z vysokaj stupieńniu budaŭničaj hatoŭnaści znachodzicca jašče šerah abjektaŭ, jakija pavinny vyvieści na rynak praktyčna 120 tys. kv. m arendnaj płoščy. U najbližejšyja miesiacy (jak miarkujecca, da Dnia horada ŭ vieraśni) pavinny ŭvieści ŭ ekspłuatacyju MFK G-S PLAZA «Žamčužyna». Tady ž mohuć adkryć i MFK na praśpiekcie Pieramožcaŭ u rajonie HZC «Zamak» i Centra tenisa.
Udzielniki rynku čakajuć i chutkaha źjaŭleńnia płoščaŭ MFK «Šantar Chił» — jon užo ŭ vysokaj stadyi budaŭničaj hatoŭnaści.
MFK na praśpiekcie Pieramožcaŭ. Fota: realt.by
A što z popytam?
Popyt na ofisnym rynku ŭ pieršyja šeść miesiacaŭ hoda praktyčna całkam nasiŭ ratacyjny charaktar.
Čaściej za ŭsio arandatary pierajazdžali ŭ bolš kampaktnyja pamiaškańni, tamu popyt faktyčna na 100% pieraklučyŭsia na nievialikija ofisy.
Ciapier, jak kaža ekśpiert, zapyty na ofis płoščaj 1000+ kv. m — padzieja na rynku, a jašče dva hady tamu jany byli typavymi.
Vialiki popyt na składskija pamiaškańni paciahnuŭ za saboj i ažyŭleńnie ŭ ofisnym siehmiencie.
Rynak čakaŭ, što ŭ hetym hodzie aktyvizujucca rasijskija inviestary: prajaviać cikavaść abo da hatovych ofisnych budynkaŭ, abo da prajektaŭ u zaviaršalnaj stadyi. Adnak usplosku aktyŭnaści nie adbyłosia, kanstatuje ekśpiert. Rasijskim hulcam nie patrebnyja ni vialikija ofisy pad ułasny biznes, ni inviestycyjnyja: unutrany popyt na arendu padaje, a dla rełakiejtu rasijskich kampanij Minsk z abjektyŭnych pryčyn nie padychodzić.
Što sa staŭkami?
Na rynku stavak asablivych źmianieńniaŭ u paraŭnańni z kancom 2022 hoda nie adbyłosia.
Rynak adaptavaŭsia da rubla, ale «cień» jeŭra ŭsio roŭna zachoŭvajecca: u pracesie pieramoŭ pa arendzie na pačatkovaj stadyi startavuju staŭku zazvyčaj usio roŭna vyznačajuć u bolš zvykłym jeŭra. Heta zadavalniaje jak arendadaŭcaŭ, tak i arandataraŭ, pryznajecca ekśpiert.
Niahledziačy na toje, što sioleta kurs rubla da jeŭra mianiaŭsia davoli dynamična, kazać pra surjoznaje źnižeńnie cen u rublach u paraŭnańni ź jeŭra nie prychodzicca.
Ci šmat svabodnych płoščaŭ?
Uzrovień vakantnaści ŭ cełym pa rynku z kanca minułaha hoda zachoŭvajecca na vysokim uzroŭni — 18—20% (ci navat vyšej, bo peŭny płast pamiaškańniaŭ i nie zaniaty arandatarami, i nie vystaŭlajecca dla arendy). Heta nietypovaja dla staličnaha ofisnaha rynku apošnich hadoŭ historyja.
Pryrost prapanavańnia za košt novych płoščaŭ byŭ umieranym, što niekalki strymała rezki rost vakantnaści. Adnak navat hetyja 20+ tys. kv. m novabudoŭlaŭ apieratyŭna nie zapaŭniajucca.
Čaho čakać dalej?
Ofisnyja abjekty, jakija vyjšli i jakija vychodziać na rynak prapanavańnia, istotna abvostrać kankurentnuju baraćbu za arandatara.
Deviełapieram novych prajektaŭ budzie niaprosta na starcie: u ich prapanujucca ofisy biez azdableńnia abo z čarnavym azdableńniem, u toj čas jak ciapier u topie popytu pamiaškańni z dobrym azdableńniem, u tym liku z meblaj i arhtechnikaj.
Praciahniecca rost vakantnaści pa miery ŭvodu novych płoščaŭ.
Popyt i dalej budzie nasić pieravažna ratacyjny charaktar, ale mahčyma źjaŭleńnie novych hrup arandataraŭ.
Moža pavialičycca kolkaść abjektaŭ z adkładzienymi terminami ŭvodu.