Pamiežny kantrol na ŭjeździe z Rasii ŭ Biełaruś raptoŭna źniali
Na biełaruska-rasijskaj miažy raptoŭna skasavali kantrol, jaki ŭviali ŭ mai. Pra heta raspaviadajuć udzielniki čataŭ, jakija sočać za situacyjaj na hetym učastku miažy. Ź ich słoŭ, jašče ŭ paniadziełak davodziłasia prachodzić kantrol u prapusknych punktach, ale ź viečara aŭtorka tych, chto ŭjazdžaje ŭ Biełaruś, užo nie praviarali, piša «Lusterka».
19.07.2023 / 13:15
Vyjezd ź Biełarusi ŭ Rasiju pa trasie M-1, ranica 5 maja. Fota vidavočcy Zerkalo.io
Uviečary 18 lipienia ŭ čacie «Miaža RF — RB» źjavilisia paviedamleńni ab tym, što z boku Biełarusi źnikli pamiežnyja punkty. Dakładny čas, kali ich prybrali, nieviadomy. Udzielniki čata paviedamlajuć, što ŭ paniadziełak, 17 lipienia, jany byli, a ŭžo ŭ aŭtorak uviečary — źnikli.
— U paniadziełak [17 lipienia] ranicaj usio było, — udakładniaje adzin z udzielnikaŭ čata. — A nočču jechaŭ sa Smalenska, było absalutna pusta.
Pra adsutnaść kantrolu havorać i tyja, chto pierasiakaŭ rasijska-biełaruskuju miažu pa trasie M-1 kala vioski Krasnaja Horka i vioski Rudnia (abiedźvie znachodziacca ŭ Smalenskaj vobłaści Rasii).
Taksama niama dadatkovaha kantrolu i kala ahraharadka Lady (Dubrovienski rajon) i kala vioski Jeziaryšča (Haradocki rajon).
— 18 lipienia kala 21:00 pry ruchu z Maskvy ŭ Minsk na lehkaviku, Čyrvonaja Horka: tolki biehła prahledzieli pašparty na rasijskim baku, dalej — ničoha, — piša jašče adna ŭdzielnica čata. — Nijakaha nadhladu, z mašyny vychodzić nie daviałosia. Usio jak da majskich, tolki davoli vialikaja čarha z fur u pravych pałosach.
Na haračaj linii Dziaržpahrankamiteta raspaviali, što kantrol sapraŭdy źniali: «Nie mahu vam skazać, budzie ci nie budzie. Na siońnia pakul źniali. A zaŭtra, moža, pastaviać».
Tam dadali, što dalejšaje raźvićcio situacyi zaležyć ad rasparadžeńnia ŭrada.
«Budzie rasparadžeńnie — budziem niejak vyrašać, što nam rabić. My nie sami prymajem rašeńnie. Jość u nas Łukašenka, urad, i jany prymajuć rašeńnie», — skazali ŭ DPK.
Kantrol prybrali na ŭsich trasach.
Nahadajem, u pačatku maja Biełaruś uviała svajho rodu pamiežny kantrol na ŭsich ujezdach z Rasii. U DPK tady kazali, što heta časovaja miera, źviazanaja z pracesam ratyfikacyi pahadnieńnia ab uzajemnym pryznańni viz z Rasijaj. A ŭ MZS heta nazyvali «nie kantrolem, a manitorynham situacyi». Užo ŭ pieršyja dni na miažy pačali źbiracca čerhi. U kancy maja Rasija ratyfikavała zhadanaje pahadnieńnie, ale kantrol zastaŭsia.