«Справа аб спадарожнікавых талерках». Малдова высылае 45 чалавек з пасольства Расіі
Малдова высылае 22 расійскія дыпламаты з-за шпіёнскага скандалу. Афіцыйная прадстаўніца Міністэрства замежных спраў Расіі Марыя Захарава заявіла на брыфінгу 26 ліпеня, што РФ расцэньвае гэта «як зусім не абгрунтаваныя і недружалюбныя дзеянні, якія не застануцца без адказу», піша Newsmaker.
26.07.2023 / 15:29
Пасольства Расіі ў Кішынёве. Фота: pasporta.org
Як удакладніў дарадца міністра замежных спраў Малдовы па камунікацыях Ігар Захараў, улады прынялі пастанову адправіць 22 дыпламаты і 23 прадстаўнікі тэхнічнага персаналу пасольства Расіі. «Іх не абвяшчаюць персонамі нон грата, а просяць пакінуць Малдову ў мэтах забеспячэння дыпламатычнага парытэту», — адзначыў ён.
Афіцыйны прадстаўнік МЗС Расіі Марыя Захарава пракаментавала рашэнне малдаўскіх уладаў.
«Расцэньваем гэта як неабгрунтаваныя і недружалюбныя дзеянні, якія не застануцца без адказу. Гэта чаргавы крок разбурэння двухбаковых адносін з боку кішынёўскага рэжыму», — заявіла Захарава.
24 ліпеня малдоўскія СМІ апублікавалі сумеснае расследаванне. Журналісты высветлілі, што на даху расійскага пасольства ў Малдове ўсталяваныя дзясяткі антэн і спадарожнікавых талерак.
Яны перахопліваюць сігналы спадарожнікавай тэлефаніі. Гэта дазваляе слухаць тэлефонныя размовы і перахопліваць перамовы па рацыі мясцовай паліцыі. Паводле звестак СМІ, з кожным годам колькасць спадарожнікавых талерак расце, а на дах амбасады паднімаюцца супрацоўнікі расійскіх спецслужбаў.
Пасля публікацыі расследавання Міністэрства замежных спраў і еўраінтэграцыі выклікала пасла Расіі ў Малдове Алега Васняцова.
Міністр Ніку Папеску абвясціў, што ўлады прынялі рашэнне скараціць колькасць расійскіх дыпламатаў.
«На наш погляд, вельмі важна, каб дыпламатычныя службы не толькі нашай краіны, але і іншых дзяржаў былі нацэлены на развіццё добрых адносін, а не на дэстабілізацыю нашай краіны. Мы дамовіліся з інстытутамі і асобамі, якія прымаюць палітычныя рашэнні, аб неабходнасці абмежавання колькасці расійскіх дыпламатаў, акрэдытаваных у Малдове. Гэта робіцца для таго, каб у Малдове было менш асоб, якія займаюцца дэстабілізацыяй краіны», — заявіў міністр.