У Кіеве хтосьці сфатаграфаваў Ляўчук і ўкраінскага блогера. Здымкамі пахваліліся «Жоўтыя слівы» — і чалавека затрымалі
Пры выпадак расказаў блогер BalaganOFF.
26.07.2023 / 18:25
Фота Ляўчука і блогера BalaganOFF, якое выклалі тэлеграм-каналы лукашэнкаўскай прапаганды
У Кіеве блогер BalaganOFF (Аляксандр Рыкаў) абедаў разам з опернай спявачкай Маргарытай Ляўчук. Нехта іх сфатаграфаваў. Праз час фоты аказаліся на каналах прапаганды — «Жоўтыя слівы» апублікавалі здымкі ўчора ўвечары.
Сёння блогер выклаў відэа затрымання мужчыны ўкраінскімі сілавікамі — па яго словах, таго самага, хто даслаў фоты з ім і Ляўчук лукашэнкаўскім прапагандыстам. Аляксандр у эфіры «Еўрарадыё» сказаў, што спецслужбы Украіны дазволілі яму нават пагаварыць з затрыманым і запісаць з ім кароткае інтэрв'ю для яго блога. Інтэрв'ю пакуль што не выйшла.
Скрын відэа затрымання
Асоба затрыманага мужчыны не раскрываецца. Учора тэлеграм-канал «Жоўтыя слівы», публікуючы фоты Ляўчук і Рыкава, падкрэсліў, што гэта ім «даклала агентура» і фоты даслалі непасрэдна ім. Ці так было насамрэч, пакуль не вядома.