JUNIESKA zaklikaje škoły ŭsiaho śvietu zabaranić vykarystańnie smartfonaŭ na ŭrokach
U arhanizacyi śćviardžajuć, što z-za hadžetaŭ u vučniaŭ adciahvajecca ŭvaha na zaniatkach, što pryvodzić da źnižeńnia paśpiachovaści.
28.07.2023 / 09:12
Fota: «Naša Niva»
U svaim novym dakładzie JUNIESKA pieraścierahaje ad praźmiernaha vykarystańnia technałahičnych pryład, hałoŭnym čynam smartfonaŭ i kampjutaraŭ. Ekśpierty arhanizacyi pierakananyja: ich treba ŭžyvać u mieru, tolki pa pryznačeńni, i kiravać pracesam pavinien kvalifikavany vykładčyk, piša Euronews.
«Ličbavaja revalucyja maje nievymierny patencyjał. I siońnia hučać zakliki, što jana pavinna rehulavacca ŭ hramadstvie. Sapraŭdy tak, treba być uvažlivym da taho, jak jaje technałohii vykarystoŭvajucca ŭ śfiery adukacyi», — zajaviła hienieralny dyrektar JUNIESKA Adry Azule.
«Ich vykarystańnie pavinna być nakiravana na pavyšeńnie jakaści navučańnia i na karyść navučencaŭ i vykładčykaŭ, a nie na škodu im».
Aŭtary dakłada pryznajuć, što novyja technałohii mohuć być karysnyja ŭ navučalnym pracesie dla asvajeńnia peŭnych navuk i atrymańnia viedaŭ u kankretnych navukovych halinach. Ale škołam varta rehłamientavać hetuju śfieru, kab paźbiehnuć zhubnaha ŭździejańnia na dziaciej.
«Danyja bujnamaštabnych mižnarodnych daśledavańniaŭ, naprykład, PISA (Mižnarodnaja prahrama pa acency adukacyjnych dasiahnieńniaŭ navučencaŭ), śviedčać ab niehatyŭnym upłyvie praźmiernaha vykarystańnia smartfonaŭ i kampjutaraŭ na paśpiachovaść navučencaŭ», — havorycca ŭ spravazdačy.
Navat prostaje znachodžańnie pobač z mabilnaj pryładaj adciahvaje školnikaŭ, ličać u JUNIESKA. Adznačajecca, što ŭ kožnaj čaćviortaj krainie śvietu smartfony ŭ škołach zabaronienyja.
U śpisie fihurujuć Francyja, jakaja ŭviała hetuju mieru ŭ 2018 hodzie, Italija, dzie nastaŭniki zabirajuć smartfony vučniaŭ u pačatku dnia. U 2024 hodzie da ich dałučacca Finlandyja i Niderłandy.
U Biełarusi ŭ mnohich škołach vučni pierad urokami zdajuć smartfony.