УСУ выкарыстоўваюць на фронце боепрыпасы з КНДР — СМІ
Украінскія артылерысты б'юць па пазіцыях расіянаў боепрыпасамі, якія былі зробленыя ў Паўночнай Карэі.
29.07.2023 / 08:39
Як піша The Financial Times (пераклад па «Украінскай праўдзе»), украінскія вайскоўцы выкарыстоўваюць снарады з КНДР недалёка ад Бахмута, дзе вядуць агонь па расійскіх пазіцыях з савецкіх рэактыўных сістэм залпавага агню «Град». Мяркуючы па маркіроўцы, адзначае выданне, большасць з гэтых боепрыпасаў былі зробленыя ў 1980-х і 1990-х гадах.
Камандзір украінскай артылерыйскай устаноўкі распавёў FT, што паўночнакарэйскія снарады часта даюць асечку ці не выбухаюць. Паводле яго слоў, боепрыпасы «вельмі ненадзейныя і часам робяць вар'яцкія рэчы».
Нягледзячы на гэта, піша выданне, украінскія вайскоўцы працягваюць выкарыстоўваць паўночнакарэйскія снарады, бо ім «патрэбны кожны боепрыпас, які можна дастаць».
Паколькі Паўночная Карэя лічыцца адным з нешматлікіх саюзнікаў Расіі, то малаверагодна, што КНДР сама паставіла боепрыпасы Украіне. Украінскія артылерысты распавялі выданню, што снарады былі «перададзеныя з карабля» дружалюбнай дзяржавай.
Ва ўкраінскім Мінабароны выказалі здагадку, што паўночнакарэйскія снарады маглі быць трафеямі, здабытымі ў расіянаў, аднак больш дакладную інфармацыю не падалі журналістам.