Kiraŭnik Kobryna pravioŭ sustreču «z pradstaŭnikami ŚMI i błohierami». Na joj, akramia jaho, było dva čałavieki, i tyja nievypadkovyja
Staršynia Kobrynskaha rajvykankama Alaksandr Pačko pravioŭ sustreču, kab abmierkavać «asnoŭnyja napramki raźvićcia i prablemy błahaśfiery».
29.07.2023 / 12:28
Artykuł pad pafasnym zahałoŭkam «Na pulsie žyćcia rodnaha kraju» na sajcie miascovaj rajonki pačynajecca z prapahandysckich zajaŭ pra infarmacyjnuju vajnu, jakaja naradziła patryjatyčna naładžanych błohieraŭ i žurnalistaŭ, što adbivajuć ataki fejkaŭ i chłuśni.
Miarkujučy z apublikavanych fota i videa, z Pačko sustrelisia hałoŭny redaktar «Kobrynskaha vieśnika» Raman Mielnik i ciktokier Pavieł Dźmitryjeŭ.
Mielnik taksama kiruje rajonnym abjadnańniem «Biełaj Rusi», piša kałonki ŭ styli Mukavozčyka, jakija na sajcie źbirajuć mienš za 50 prahladaŭ.
Dźmitryjeŭ zdymaje ciktoki pad psieŭdanimam PałVanyč, u jaho 12 tysiač padpisčykaŭ. Jon kiruje piarvičkaj BRSM na Kobrynskim chlebazavodzie i zdymaje roliki pra mierapryjemstvy arhanizacyi. Časam źjaŭlajecca ŭ kadry ŭ łukašenkaŭskim mierčy.
Na sustrečy z kiraŭnikom rajona Dźmitryjeŭ padzialiŭsia idejaj stvareńnia ŭ horadzie skiejt-parka.
U artykule «Kobrynskaha vieśnika» havorycca, što błohiery i žurnalisty z praŭładnaj pazicyjaj danosiać praŭdu da šmattysiačnaj aŭdytoryi. Artykuł pra sustreču Pačko pračytała mienš za 100 čałaviek.