Pa harełku i muku — na rynak
30.11.2009 / 19:16
S 1 śniežnia ŭ Biełarusi pašyrajecca pieralik tavaraŭ, jakimi možna handlavać na rynkach, paviedamili ŭ Ministerstvie handlu.
U adpaviednaści z pastanovaj Savieta Ministraŭ numar 1102 ad 24 žniŭnia hetaha hoda, jakaja ŭstupaje ŭ siłu z 1 śniežnia, u hety pieralik uklučany ałkaholnyja napitki, tytuniovyja vyraby, cukar, muka, jajki i inšyja tavary.
Pry hetym handlavać ałkaholnymi napitkami na rynku možna tolki ŭ stacyjanarnych handlovych abjektach. Dazvolena realizacyja ałkaholnych napitkaŭ i tytuniovych vyrabaŭ u mahazinach, abjektach hramadskaha charčavańnia, raźmieščanych na terytoryi rynkaŭ, niezaležna ad ich prynaležnaści. Raniej heta było mahčyma tolki ŭ prynaležnych Biełkaapsajuzu mahazinach i pradpryjemstvach hramadskaha charčavańnia, jakija majuć handlovuju zału.
Spraščajecca i handal cukram, mukoj, piratechničnymi vyrabami, nasieńniem maku, jajkami, a taksama kaštoŭnymi mietałami i kamianiami, žemčuham, burštynam, moranym dubam ŭ apravie z kaštoŭnych mietałaŭ i hadzińnikami ŭ karpusach z kaštoŭnych mietałaŭ. Ciapier hetyja tavary možna budzie kupić akramia zvyčajnych mahazinaŭ i ŭ mahazinach‑składach. Adroźnieńnie mahazina‑składa ŭ tym, što tut ažyćciaŭlajecca aptovy prodaž tavaraŭ jurydyčnym asobam, ich padraździaleńniam i indyvidualnym pradprymalnikam pa mietadu samaabsłuhoŭvańnia ź minimalnaj handlovaj nadbaŭkaj, a mahaziny — heta abjekty roźničnaha handlu.
Handlavać kurynymi jajkami na rynku raniej mieli prava tolki pradpryjemstvy‑vytvorcy. Ciapier prodaž dazvoleny i indyvidualnym pradprymalnikam na handlovych radach.
Jak paviedamili ŭ Minhandli, pašyreńnie pieraliku tavaraŭ, pradavać jakija možna na rynkach, daść mahčymaść indyvidualnym pradprymalnikam i jurydyčnym asobam, jakija ažyćciaŭlajuć drobnaaptovy handal, značna pašyryć asartymient i pavialičyć tavaraabarot. U pakupnikoŭ ža źjavicca bolš mahčymaściej nabyć nieabchodnyja tavary.