Польшча адправіла на мяжу з Беларуссю сваіх снайпераў
Польшча прымае дадатковыя меры бяспекі на сваёй мяжы з Беларуссю пасля навін аб накіраванні ў гэты раён наймітаў з ПВК «Вагнер». Генеральнае камандаванне Узброеных сіл Польшчы напісала ў твітары, што мяжу ўздоўж патрулююць снайперы.
31.07.2023 / 16:30
«Снайперы — майстры разведкі, навігацыі, працы са зброяй. Для іх характэрныя ўпэўненасць у сабе, цярплівасць і назіральнасць», — гаворыцца ў пасце.
У Варшаве запэўнілі, што снайперы рэгулярна трэніруюцца як днём, так і ноччу, каб забяспечыць максімальную эфектыўнасць дзеянняў ва ўмовах магчымай пагрозы.
Раней упаўнаважаны ўрада па бяспецы інфармацыйнай прасторы Польшчы Станіслаў Жарын заявіў, што сітуацыя на мяжы Польшчы з Беларуссю застаецца напружанай, а «напады на польскіх памежнікаў — ахоўнікаў і салдат — з боку груп агрэсіўных замежнікаў адбываюцца штодня».
Перад тым, 29 ліпеня, прэм'ер-міністр Польшчы Матэвуш Маравецкі падчас прэс-канферэнцыі сказаў, што ў Польшчы ёсць інфармацыя пра тое, што больш за 100 наймітаў групы «Вагнер» рушылі ў бок Сувалкскага калідора каля Гродна. Таму, як заявіў Маравецкі, сітуацыя становіцца ўсё больш небяспечнай.
Чытайце таксама:
Сёння прыкмет правакацый вагнераўцаў супраць Літвы няма, але ёсць спакуса іх зладзіць — Наўседа
Міністр абароны Літвы: Мы не збіраемся дрыжэць перад вагнераўцамі ў Беларусі
Вагнераўцы пачалі трэніраваць у Беларусі падраздзяленні механізаваных брыгад — Мінабароны