Biełaruskija vajskovyja viertaloty zalacieli ŭhłyb terytoryi Polščy na 2 km, išli na nizkaj vyšyni
dapoŭniena
Polskija radary ich nie zaŭvažyli, ale žychary miastečka Biełavieža sfatahrafavali ich prosta nad strechami svaich chat.
01.08.2023 / 21:08
Fota: Eliza Kavalčyk
Na viertalotach na małoj vyšyni niemahčyma nie zaŭvažyć miažy ź jaje kantrolna-śledavymi pałosami, a z polskaha boku — i z vysokaj ścianoju. Kali zalot byŭ namierany, heta pravakacyja, jakaja moža mieć nastupstvy dla polska-biełaruskich adnosin.
Ab pralocie biełaruskich viertalotaŭ pieršymi paviedamili žychary haradka Biełavieža, što ŭ Padlašskim vajavodstvie pablizu polska-biełaruskaj miažy. Tam časta prachodziać vajskovyja vučeńni, tamu spačatku miascovyja nie nadali značeńnia šumu matoraŭ. Ale kali mašyny z čyrvonymi zorkami źjavilisia nad strechami ich chat, nie zaŭvažyć ich stała niemahčyma. Fota biełaruskich viertalotaŭ apublikavała miascovaja žycharka Eliza Kavalčyk. Jaje słovy paćvierdzili inšyja miascovyja žychary: viertaloty lotali nad dachami ich damoŭ.
Fota: https://twitter.com/SluzbyiObywatel
Polskija OSINT-daśledčyki, jakija analizujuć adkrytyja danyja, pa fatahrafijach vyznačyli, jašče viertaloty zalacieli ź Biełarusi ŭ Polšču kala vioski Hrudki, zajšli prykładna na try kiłamietry ŭhłyb krainy, a paśla raźviarnulisia i palacieli nad Biełaviežaj.
Paźniej «Biełaruski Hajun» vyznačyŭ, što viertaloty pahłybilisia ŭ pavietranuju prastoru Polščy na 2,3 km.
Fota: sluzbyiobywatel.pl
Polskija vajskoŭcy fakt pierasiačeńnia miažy viertalotami spačatku asprečvali, ale paśla pryznali, što sapraŭdy mieła miesca parušeńnie pavietranaj prastory Polščy dvuma biełaruskimi viertalotami.
Pierasiačeńnie miažy adbyłosia ŭ rajonie Biełaviežy na vielmi małoj vyšyni, što ŭskładniaje jaho vyjaŭleńnie radyjołakacyjnymi sistemami. Tamu polskija radyjołakacyjnyja sistemy nie zafiksavali parušeńnia pavietranaj prastory Polščy, patłumačyli ŭ Minabarony.
Varšava taksama paviedamiła, što biełaruski bok infarmavaŭ polski ab vučeńniach kala miažy.
U MZS Polščy vyklikany biełaruski časovy pavierany dla dačy tłumačeńniaŭ, a ministerstva abarony pryniało rašeńnie vysłać da miažy dadatkovyja padraździaleńni.
Cikava, što ŭ čas, kali biełaruskija viertaloty ablacieli polskuju Biełaviežu, Alaksandr Łukašenka naviedvaŭ pasiołak Biełaviežski litaralna za paru dziasiatkaŭ kiłamietraŭ pa inšy bok miažy. Viertalot Łukašenki pieralacieŭ tudy z rezidencyi ŭ Viskulach.
Čytajcie taksama:
Łukašenka pryhraziŭ padryvam BiełAES i zajaviŭ pra kantraktnuju armiju na asnovie vahnieraŭcaŭ
Polšča adpraviła na miažu ź Biełaruśsiu svaich snajpieraŭ
Siońnia prykmiet pravakacyj vahnieraŭcaŭ suprać Litvy niama, ale jość spakusa ich zładzić — Naŭsieda