Prapahanda zrabiła «rasśledavańnie» pra Cichanoŭskuju, jakaja «kaštavała marychuanu». Jano hruntujecca na vydumanaj cytacie
Praŭładnyja kanały adzin za adnym pierapoščvać niby słovy Cichanoŭskaj pra lehalizacyju narkotykaŭ. «Vidavočnaje pryznańnie Cichanoŭskaj», — anansuje telehram-kanał BT. Ale jość niuans.
03.08.2023 / 18:19
Skrynšot natatki z sajta žartaŭlivych navin «Panarama»
Siońnia praŭładny kanał «Fakty na stoł» vypuściŭ materyjał pra toje, što Cichanoŭskaja byccam by kazała, što vystupaje za lehalizacyju narkotykaŭ.
Dopis pryśviečany arhanizacyi Legalize Belarus, jakaja vystupaje za dekryminalizacyju ŭžyvańnia narkotykaŭ i inšych psichaaktyŭnych rečyvaŭ, a taksama libieralizacyju antynarkatyčnaha zakanadaŭstva ŭ Biełarusi. Aŭtar padvodzić da taho, što byccam by za heta ž vystupaje i Śviatłana Cichanoŭskaja: maŭlaŭ, pahladzicie, kudy jana nas viadzie. Pryvodzicca cytata, jakaja prypisvajecca Cichanoŭskaj:
«U starejšaha pakaleńnia biełarusaŭ jość peŭnaja praduziataść u adnosinach da marychuany. Ja sama sprabavała marychuanu, viedaju, što i ŭ ES, kudy Biełaruś imkniecca, marychuana dazvolenaja. U toj ža čas moładź lubić pakuryć i rassłabicca, a ŭ vyniku joj dastajecca ad milicyi… Kali kazać pra staroje pakaleńnie, to budziem pravodzić ahitacyju, raspaviadać pra karyść lohkich narkotykaŭ, dadzim mahčymaść biaspłatnaj dehustacyi. Marychuanu možna budzie svabodna vyroščvać i pradavać, a nie tolki ŭžyvać u publičnych miescach».
Spasyłajucca aŭtary na intervju Cichanoŭskaj, jakoha nie isnuje, adnoj z najbolšych haziet Niderłandaŭ De Telegraaf. Aryhinał cytaty lohka znachodzicca praz pošuk — heta dopis sajta z žartaŭlivymi navinami IA «Panarama».
«Vykryćcio» Cichanoŭskaj užo paśpieŭ pierapościć telehram-kanał BT, HUBAZiKa, «Žoŭtyja źlivy». Novyja reposty na drobnych praŭładnych kanałach praciahvajucca.
Skrynšot z telehram-kanałaŭ «Žoŭtyja źlivy» i ATN
Čytajcie taksama:
Prapahandyst Piatroŭski pavioŭsia na afišu fejkavaha filma. I navat «praanalizavaŭ» jaho
«Nas nie zapuhať». Voś chto stvaraŭ prałukašenkaŭskija stykierpaki ŭ telehramie
Siamja Vaskrasienskaha jedzie ŭ adpačynak — nie pa Biełarusi i nie ŭ Rasiju