Iosif Siaredzič pakidaje pasadu hałoŭnaha redaktara «Narodnaj Voli». Los vydańnia pad pytańniem
Jon byŭ hałoŭnym redaktaram vydańnia na praciahu 28-mi hadoŭ z momantu zasnavańnia haziety ŭ lipieni 1995 hoda.
04.08.2023 / 10:56
Iosif Siaredzič. Fota: «Radyjo Svaboda»
«Ja zychodžu. Z bolem u sercy ja vymaŭlaju hetyja słovy. Ale žyćcio jość žyćcio. Praz paru miesiacaŭ mnie spoŭnicca 75 hadoŭ. I chočaš nie chočaš, treba raźvitvacca ź ciažkaj štodzionnaj pracaj, i zdaroŭje nahadvaje pra nieabchodnaść spynicca, i abstaviny času nie spryjajuć aktyŭnaj dziejnaści.
Vy, šanoŭnyja prychilniki «Narodnaj Voli», viedajecie, na jakija haniebnyja kroki pajšli peŭnyja siły, kab nas razłučyć, spačatku admovili ŭ drukarskich pasłuhach, a niadaŭna anulavali paśviedčańnie ab rehistracyi haziety, jakaja na praciahu bolš za 10 hadoŭ nie mieła nivodnaha papiaredžańnia ni ad Ministerstva infarmacyi, ni ad Administracyi prezidenta. Biez usialakich padstaŭ źniščyli vydańnie, jakoje źjaŭlałasia ŭzoram dla ŭsich biełaruskich ŚMI», — napisaŭ Iosif Siaredzič u zvarocie.
«Na raźvitańnie chaču skazać, što za 28 hadoŭ my, naradavolcy, nie zdradzili ni sumleńniu, ni Svabodnamu Słovu, ni Radzimie! Zastaniomsia takimi i nadalej», — dadaŭ Siaredzič.
«Ja adychodžu z Enhielsa, 34A, dzie amal try dziesiacihodździ mieściŭsia redakcyjny ofis, ale zaŭsiody budu razam z Vami, maje prychilniki, usie dobryja ludzi! Dziakuj Vam, šanoŭnyja, za ščyruju padtrymku, za Vaš žyćcieśćviardžalny hołas, jaki hučaŭ sa staronak kožnaha numara niezaležnaj haziety», — zaklučyŭ jon.
Iosif Siaredzič taksama paviedamiŭ, što pravy ŭłaśnika sajta nv-online.info jon pieradaŭ inšaj asobie, tamu elektronny partał nie źnikaje ź infarmacyjnaha pola. «I chočacca spadziavacca, što sajt jak danosiŭ, tak i budzie danosić PRAŬDU da šyrokaj hramadskaści», — dadaŭ Iosif Siaredzič.
Iosif Siaredzič u 1990—1995 hady ŭznačalvaŭ «Narodnuju hazietu», jakaja była orhanam parłamienta i karystałasia šalonaj papularnaściu. Jaje nakład siahaŭ pad 500 tysiač asobnikaŭ. U pačatku 1995 hoda Siaredziča zvolnili z pasady hałoŭnaha redaktara, i jon zasnavaŭ razam z adnadumcami ŭ lipieni 1995 hoda «Narodnuju Volu», hazieta amal adrazu źviedała ciažkaści i pieršyja hady drukavałasia ŭ Smalensku.
***
Redakcyja «Narodnaj Voli» była vymušanaja spynić druk haziety ŭ listapadzie 2020 hoda paśla taho, jak ułady zabaranili ź joj supracoŭničać usim biełaruskim drukarniam i pierakryli mahčymaści drukavacca za miažoj.
Hazieta vydavałasia ŭ PDF-farmacie, ale ŭ pačatku 2023 hoda było prypyniena i heta, a ŭ červieni Mininfarm anulavaŭ paśviedčańnie ab rehistracyi. 31 lipienia pierastaŭ abnaŭlacca sajt vydańnia.