U ZŠA ŭchvalili pieršuju tabletku ad paślarodavaj depresii
Vytvorcy lekaŭ, kampanii Sage Therapeutics i Biogen, zajavili, što tabletki pavinny źjavicca ŭ prodažy ŭ kancy hetaha hoda. Ich košt pakul nie abvieščany.
07.08.2023 / 08:59
Fota: Juanna Hashe / Getty Images
Amierykanskaje ŭpraŭleńnie nahladu za jakaściu charčovych praduktaŭ i miedykamientaŭ (FDA) vyrašyła, što preparat «Zuranałon», jaki pradajecca pad handlovaj markaj Zurzuvae, možna prymać adzin raz na dzień ciaham dvuch tydniaŭ, piša Bi-bi-si.
Jak paviedamiła FDA, da hetaha času dla lačeńnia paślarodavaj depresii (PRD) vykarystoŭvalisia tolki preparaty, jakija treba ŭvodzić pry dapamozie ŭnutryviennaj injekcyi.
Vytvorcy lekaŭ, kampanii Sage Therapeutics i Biogen, zajavili, što tabletki pavinny źjavicca ŭ prodažy ŭ kancy hetaha hoda. Ich košt pakul nie abvieščany.
Jak i pry inšych formach depresii, simptomy paślarodavaj depresii (PRD) mohuć uklučać drenny nastroj, nizki ŭzrovień enierhii, suicydalnyja dumki, źnižeńnie zdolnaści adčuvać zadavalnieńnie abo kahnityŭnyja parušeńni.
Pavodle daśledavańniaŭ, simptomy paślarodavaj depresii adčuvaje kožnaja siomaja žančyna ŭ ZŠA.
«Paślarodavaja depresija — heta surjoznaje i patencyjna niebiaśpiečnaje dla žyćcia rasstrojstva, pry jakim žančyny adčuvajuć tuhu, vinu, niepatrebnaść i navat u ciažkich vypadkach dumajuć ab pryčynieńni škody sabie abo dziciaci», — kaža Cifani Farčyone, kiraŭnik psichijatryčnaha centra FDA.
«I tak jak paślarodavaja depresija moža razburyć suviaź maci i dziciaci, jana taksama zdolnaja akazvać uździejańnie na fizičnaje i emacyjnaje raźvićcio dziciaci», — adznačyła Farčyone.
Jana dadała, što novyja tabletki mohuć dapamahčy mnohim žančynam, jakija sprabujuć spravicca «sa składanymi, a časam i niebiaśpiečnymi dla žyćcia pieražyvańniami».
Kliničnyja vyprabavańni pakazali, što tabletka dapamahła značna pamienšyć simptomy depresii na praciahu troch dzion paśla pieršaha pryjomu.
Pavodle danych FDA, dziejańnie preparatu praciahvałasia praz čatyry tydni paśla apošniaj dozy.
Razam z tym FDA adznačaje, što najbolš raspaŭsiudžanymi pabočnymi efiektami ad pryjomu preparatu Zurzuvae mohuć być sanlivaść, hałavakružeńnie, dyjareja, stomlenaść, prastuda i infiekcyi močavydzialalnych šlachoŭ.
Ahienctva taksama paviedamiła, što na etykietcy ŭtrymlivajecca papiaredžańnie ab tym, što Zurzuvae moža paŭpłyvać na zdolnaść čałavieka kiravać aŭtamabilem i vykonvać inšyja patencyjna niebiaśpiečnyja dziejańni.
Pacyjentam rekamiendujecca ŭstrymacca ad kiravańnia transpartnym srodkam abo pracy ź ciažkimi miechanizmami na praciahu jak minimum 12-ci hadzin paśla pryjomu lekaŭ.
Kampanii Sage Therapeutics i Biogen taksama paprasili ŭchvalić prymianieńnie «Zuranałonu» pry kliničnaj depresii.
Ale FDA zajaviła, što ŭ hetym vypadku nie było pradstaŭlena istotnych dokazaŭ efiektyŭnaści, i prapanavała pačakać dadatkovych daśledavańniaŭ i raspracovak.
Pradstaŭniki Sage Therapeutic zajavili, što zasmučanyja hetym rašeńniem na fonie ciapierašniaha kryzisu psichičnaha zdaroŭja, kali miljony ludziej z kliničnaj depresijaj sprabujuć znajści sposab palehčyć svaje simptomy.