Ціханоўская заклікала прэзідэнта Літвы не ўраўноўваць абмежаванні супраць беларусаў і расіян
Святлана Ціханоўская правяла сёння сустрэчу з прэзідэнтам Літвы Гіатанасам Наўседам.
09.08.2023 / 14:42
Дэмакратычны лідар Беларусі адзначыла, што гэтае ўніфікаванне грае на руку прапагандзе, «дэмаралізуе беларусаў, і абмяжоўвае працу грамадзянскай супольнасці».
Замест гэтага яна прапанавала пашыраць санкцыі супраць да памагатых рэжыму Аляксандра Лукашэнкі, паведаміў «Позірку» галоўны дарадца палітыка Франак Вячорка.
Бакі таксама абмеркавалі магчымае закрыццё межаў з Беларуссю і «неабходнасць захавання гуманітарных калідораў на выпадак эскалацыі» сітуацыі.
Ціханоўская выказала падзяку за падтрымку дэмсупольнасці, за тое, што Літва «прыняла дзясяткі тысяч беларусаў і сотні арганізацый, якія былі вымушаныя выехаць з краіны праз рэпрэсіі».
Яна адзначыла, што «разумее ўсе рызыкі, звязаныя з магчымай агентурнай дзейнасцю грамадзян Беларусі», але «гэта не павінна ўдарыць па беларусах, якія не падтрымліваюць рэжым і Расію, а такіх абсалютная большасць».