Ад заўтра «Белсат» будзе вяшчаць праз спадарожнік у HD-якасці
Каб глядзець перадачы ў вышэйшай якасці гледачам не спатрэбіцца ніякіх налад.
10.08.2023 / 12:05
«Шаноўныя гледачы! Ад заўтра (11.08) Белсат TV праз спадарожнік будзе перадаваць сігнал у якасці HD, на YT так ужо даўно. Вам рабіць зусім нічога не трэба, проста пабачыце лепшую карцінку — цешымся!
А што спадарожнікавы сігнал яшчэ некалі спатрэбіцца, дык не сумняваюся. З нас бывала пасмейваліся, маўляў, навошта трымаць той спадарожнік, калі ўсе даўно праз нэт глядзяць.
Але ў гэтыя дні тры гады таму мы засталіся для ўсёй Беларусі ледзь не адзінаю крыніцаю інфармацыі, бо хунта ўзяла ды выключыла нэт. Людзі тады збіраліся цэлымі групамі, глядзелі Белсат з суседзямі, знаёмымі, на дачах, шукаючы праз нас у тым ліку і сваіх затрыманых сваякоў або сяброў», — напісаў у фэйсбуку намеснік дырэктара Аляксей Дзікавіцкі.