«Ратуючыся ад стыхіі, людзі ў паніцы бягуць да акіяна». На Гавайскіх выспах бушуюць лясныя пажары
Лясныя пажары ахапілі востраў Мауі — адзін з найбуйнейшых астравоў Гавайскага архіпелага, папулярны сярод турыстаў. Паводле апошніх звестак, загінулі 36 чалавек. Віцэ-губернатар штата назвала пажары беспрэцэдэнтнымі, піша Бі-бі-сі.
10.08.2023 / 15:00
Лясныя пажары на Гаваях спалілі мноства будынкаў у раёнах, уключаючы гістарычны горад Лахайна, што прывяло да эвакуацыі і закрыцця школ у некалькіх населеных пунктах у сераду, а ратавальнікі выцягнулі з акіяна тузін чалавек, якія ратаваліся ад дыму і полымя. Фота: Zeke Kalua/County of Maui via AP
Пажары выкліканыя моцнай спёкай і засухай, а хуткаму распаўсюду агню спрыяе моцны вецер ад урагану «Дора», які бушуе над Ціхім акіянам за сотні кіламетраў на поўдзень ад выспаў.
Гарачае надвор'е, выкліканае кліматычнымі зменамі на планеце ў спалучэнні з іншымі фактарамі, усталявалася гэтым летам у многіх амерыканскіх штатах, а таксама ў Еўропе і Азіі.
Лясныя пажары на Гаваях, як правіла, не такія маштабныя, як у Каліфорніі і іншых штатах на мацерыковай частцы ЗША, аднак мясцовыя жыхары кажуць, што нічога такога яшчэ не бачылі.
«Я не хачу драматызаваць сітуацыю, але, па-мойму, нічога падобнага на Мауі яшчэ не здаралася, — сказала AFP кіраўніца мясцовай школы серфінгу. — Незвычайна, што пажары ахапілі так шмат раёнаў, яны па ўсім востраве».
Ратуючыся ад стыхіі, людзі ў паніцы бягуць да акіяна. Служба берагавой аховы ЗША паведаміла, што вылавіла 12 мясцовых жыхароў, якія кінуліся ў акіян, ратуючыся ад пажараў.
З-за пажараў тысячы людзей засталіся без электрычнасці і тэлефоннай сувязі, многім давялося эвакуявацца. Паводле інфармацыі ўладаў, каля 4 тысяч чалавек спрабуюць пакінуць востраў, які з'яўляецца папулярным турыстычным напрамкам.