«Ratujučysia ad stychii, ludzi ŭ panicy biahuć da akijana». Na Havajskich vyspach bušujuć lasnyja pažary
Lasnyja pažary achapili vostraŭ Maui — adzin z najbujniejšych astravoŭ Havajskaha archipiełaha, papularny siarod turystaŭ. Pavodle apošnich źviestak, zahinuli 36 čałaviek. Vice-hubiernatar štata nazvała pažary biesprecedentnymi, piša Bi-bi-si.
10.08.2023 / 15:00
Lasnyja pažary na Havajach spalili mnostva budynkaŭ u rajonach, uklučajučy histaryčny horad Łachajna, što pryviało da evakuacyi i zakryćcia škoł u niekalkich nasielenych punktach u sieradu, a ratavalniki vyciahnuli z akijana tuzin čałaviek, jakija ratavalisia ad dymu i połymia. Fota: Zeke Kalua/County of Maui via AP
Pažary vyklikanyja mocnaj śpiokaj i zasuchaj, a chutkamu raspaŭsiudu ahniu spryjaje mocny viecier ad urahanu «Dora», jaki bušuje nad Cichim akijanam za sotni kiłamietraŭ na poŭdzień ad vyspaŭ.
Haračaje nadvorje, vyklikanaje klimatyčnymi źmienami na płaniecie ŭ spałučeńni ź inšymi faktarami, ustalavałasia hetym letam u mnohich amierykanskich štatach, a taksama ŭ Jeŭropie i Azii.
Lasnyja pažary na Havajach, jak praviła, nie takija maštabnyja, jak u Kalifornii i inšych štatach na macierykovaj častcy ZŠA, adnak miascovyja žychary kažuć, što ničoha takoha jašče nie bačyli.
«Ja nie chaču dramatyzavać situacyju, ale, pa-mojmu, ničoha padobnaha na Maui jašče nie zdarałasia, — skazała AFP kiraŭnica miascovaj škoły siorfinhu. — Niezvyčajna, što pažary achapili tak šmat rajonaŭ, jany pa ŭsim vostravie».
Ratujučysia ad stychii, ludzi ŭ panicy biahuć da akijana. Słužba bierahavoj achovy ZŠA paviedamiła, što vyłaviła 12 miascovych žycharoŭ, jakija kinulisia ŭ akijan, ratujučysia ad pažaraŭ.
Z-za pažaraŭ tysiačy ludziej zastalisia biez elektryčnaści i telefonnaj suviazi, mnohim daviałosia evakujavacca. Pavodle infarmacyi ŭładaŭ, kala 4 tysiač čałaviek sprabujuć pakinuć vostraŭ, jaki źjaŭlajecca papularnym turystyčnym napramkam.