Ci budzie biełaruski rubiel słabieć dalej? Tłumačyć ekanamist
Biełaruski rubiel asłab. Tolki z pačatku miesiaca dalar padaražeŭ amal na 15 kapiejek, abo 5%, u paraŭnańni z kursam na 1 žniŭnia. «Naša Niva» spytała ŭ ekanamista, čamu tak adbyvajecca i ci zachavajecca hetaja tendencyja.
11.08.2023 / 08:06
Ekśpiert BEROC Nastaśsia Łuzhina adznačaje, što ciapier my ŭ pieršuju čarhu bačym adhałoski taho, što adbyvajecca na rasijskim valutnym rynku.
«Rasijski rubiel źnižajecca da dalara i jeŭra. Bloomberg uklučyŭ rubiel u trojku najhoršych valut. Za hod jon asłabieŭ amal na čverć», — adznačaje ekanamist.
Biełaruski rubiel u svaju čarhu paŭtaraje trajektoryju rubla rasiejskaha. Za vyklučeńniem tarhoŭ čaćviarha, biełaruski rubiel umacoŭvaŭsia ŭ dačynieńni da rasijskaj valuty.
Siarod pryčyn, čamu prasiadajuć rubiel rasijski, ekanamist nazyvaje nastupnyja momanty.
Rost cenaŭ na naftu moža pryvieści da rostu rubla
«Asnoŭny faktar, čamu tak adbyvajecca z rublom u tym, što ŭ RF značna horšaje salda biahučaha rachunku. Pakazčyk pakul zastajecca stanoŭčy, ale jon skaraciŭsia ŭ niekalki razoŭ. Valuty na rynak vychodzić našmat mienš, čym hod tamu. U dadatak da hetaha idzie vyvad kapitał z Rasii. Raście popyt na kuplu valuty z boku nasielnictva. Usio heta akazvaje cisk na valutny rynak», — tłumačyć Łuzhina.
Havoračy ab prahnozach, ekanamist nie vyklučaje, što ŭžo da kanca žniŭnia moža adbycca adkat, kali budzie adbyvacca ŭmacavańnie rubla rasijskaha, a za im i biełaruskaha.
«Čakajecca zakančeńnie padatkovaha pieryjadu, što budzie stymulavać eksparcioraŭ pradavać bolš valuty. Heta moža padtrymać kurs. U dadatak da hetaha patrochu rastuć ceny na naftu. Usio heta moža stać stymułam dla taho, kab prynamsi jaho padzieńnie spyniłasia».
Siarod inšaha ekanamist adznačaje, što na stabilizacyju moža paŭpłyvać i rašeńnie Centrabanka pavysić ŭlikovuju staŭku (anałah staŭki refinansavańnia ŭ RB).
Usio heta, na dumku ekśpierta, moža dapamahčy rasiejskamu rublu nie pierastupić miažu 100 rubloŭ za 1 dalar.
Tym nie mienš, na kurs rubla biełaruskaha mohuć akazvać upłyŭ nie tolki źniešnija faktary, jak prasiadańnie rubla rasijskaha, ale i ŭnutranyja.
U biełaruskaj ekanomicy kryzisu niama
U biełaruskaj ekanomicy taksama pačynaje prahladacca tendencyja da skaračeńnia pazityŭnaha salda ŭ handlovym bałansie pa tavarach i pasłuhach.
«U źniešnim handli tavarami my majem admoŭnyja pakazčyki, ale ŭ handli pasłuhami — tradycyjna ŭ plusie, tamu ŭ cełym salda stanoŭčaje, ale jano ŭžo daloka nie takoje viasiołkavaje, jak heta było hod tamu.
Što z salda ŭsio było ŭ paradku paćviardžaŭ i toj fakt, što ŭ nas pavialičylisia zołatavalutnyja reziervy. Tamu pakul nielha kazać pra kryzisnyja situacyi mienavita ŭnutry biełaruskaj ekanomiki», — kaža Łuzhina.
Adnak, na dumku ekanamista, kali budzie mieć praciah stymulujučaja hrašova-kredytnaja palityka, a zarobki praciahnuć aktyŭna raści, to całkam mahčyma, što ŭžo ŭ bližejšyja miesiacy budzie admoŭnaje salda handlovaha bałansu, jakoje budzie akazvać upłyŭ na kurs biełaruskaha rubla. U takim vypadku na pasłableńnie nacyjanalnaj valuty budzie akazvać upłyŭ nie tolki rasijski faktar, ale i ŭnutrany.
Čytajcie taksama:
Klijenty daviernaha kiravańnia sudzilisia z Alfa-Bankam, ale hrošaj nie viarnuli. Što vyrašyŭ sud?
U Biełarusi ŭžo niekalki hadoŭ ažyjataž na bankaŭskija jačejki. U čym pryčyna?