U Akolicy pad Minskam na zahad Łukašenki pačynajuć budavać katedžny pasiołak dla vajskoŭcaŭ
Raboty pa zabudovie žyłoha rajona «Novaja Akolica» pad Minskam, pra jaki Łukašenka kazaŭ u červieni hetaha hoda, užo pačalisia. Pra heta zajaviŭ ministr architektury i budaŭnictva Rusłan Parchamovič.
10.08.2023 / 17:13
Vioska Akolica raźmieščana na abodvuch bierahach žyvapisnaha Dubrovienskaha vadaschovišča. Vid na vadaschovišča i Kryžahorski kaścioł z tramplina spartkompleksu «Raŭbičy». Fota: Wikimedia Commons
Havorka idzie pra terytoryju, jakaja prylahaje da vioski Akolica Minskaha rajona, što raźmieščana za niekalki kiłamietraŭ ad Astrašyckaha Haradka i dzie znachodzicca spartyŭny kompleks «Raŭbičy». Niedaloka ad vioski raźmiaščajecca adnajmiennaja vajskovaja čaść.
Pavodle słoŭ ministra, u ekśpierymientalnym rajonie źjaviacca adnapaviarchovyja i šmatpaviarchovyja žyłyja damy ŭ industryjalnym vykanańni, abjekty inžynierna-transpartnaj i sacyjalnaj infrastruktury. Na budaŭnictvie žylla i sacabjektaŭ buduć zadziejničany arhanizacyi Minbudarchitektury, Minskaj vobłaści, a taksama inšych rehijonaŭ.
Pra toje, što ŭ žniŭni budaŭniki prystupajuć da ŭźviadzieńnia novaha katedžnaha pasiołka ŭ vioscy Akolica, u intervju BiełTA adznačyŭ i hienieralny dyrektar pradpryjemstva «Brestžyłbud» Alaksandr Ramaniuk:
«U žniŭni razam ź inšymi domabudaŭničymi kambinatami krainy my prystupajem da budaŭnictva novaha katedžnaha pasiołka ŭ vioscy Akolica Minskaha rajona. Tam my pavinny pabudavać 10 adnakvaternych žyłych damoŭ. Heta budzie arendnaje žyllo dla vajskoŭcaŭ», — skazaŭ kiraŭnik pradpryjemstva.
Pra novuju viosku pad Minskam Łukašenka kazaŭ u červieni hetaha hoda na naradzie z kiraŭnictvam Saŭmina:
«U rajonie Akolicy my vyrašyli pabudavać viosku. Adpaviednaje daručeńnie było dadziena vice-premjeru Anatolu Sivaku. Jak jamu prapanujuć abo jon sam «palcam na piasku» nakreślić, tak i budavać. Treba pabudavać chutka i efiektyŭna pryhožuju viosku − ludzi z zadavalnieńniem tam buduć žyć, kupiać hetyja ŭčastki».
Čytajcie taksama:
Ułady Minska raskazali, kali pačnuć budavać kvatery na miescy šmatpakutnaha «Huliviera»
Jakija źmieny praduhledžvajucca novymi hienpłanami haradoŭ-spadarožnikaŭ Minska?