U Minsku ŭpieršyniu za 10 hadoŭ projdzie aŭtavystaŭka. Na joj pakažuć novy kitajski tvar biełaruskaha aŭtarynku
U Minsku znoŭ projdzie bujnaja aŭtamabilnaja vystaŭka. Apošni raz padobnaja vystaŭka, tady «Motaršou», pravodziłasia až u 2013 hodzie. Pra heta paviedamlaje vydańnie Office Life.
10.08.2023 / 18:51
Geely na aŭtasałonie. Fota: Wikimedia Commons
Na praciahu 10 hadoŭ paŭnavartasnych aŭtamabilnych vystavak u Biełarusi nie było. Tłumačyłasia heta ahulnaj situacyjaj na aŭtamabilnym rynku i ŭ ekanomicy krainy ŭ cełym.
Sioleta aŭtamabilnaja asacyjacyja «BAA», jakaja raniej pravodziła «Motaršou», abviaściła ab praviadzieńni vystaŭki pad novaj nazvaj — «Aŭta Ekspa». Jana adbudziecca ŭ staličnym futbolnym maniežy pa praśpiekcie Pieramožcaŭ z 4 da 8 kastryčnika.
Jak paviedamlajecca, pra svoj udzieł užo zajavili bolš za 25 brendaŭ, pradstaŭlenych na biełaruskim rynku. Siarod ich šmat novych, u tym liku kitajskich, pakul jašče małaznajomych biełaruskim aŭtaamataram.
«Motaršou» ŭ 2011 hodzie.
Staršynia praŭleńnia aŭtamabilnaj asacyjacyi «BAA» Siarhiej Varyvoda patłumačyŭ, što biełaruski rynak pieražyŭ niabačanuju raniej transfarmacyju madelnaha šerahu, na źmienu dobra viadomym markam i madelam pryjšli małaznajomyja brendy z Kitaja. Identyfikacyja i razumieńnie adroźnieńniaŭ pamiž imi časta byvaje ciažkaj zadačaj navat dla prafiesijanałaŭ. Zvyčajny spažyviec błytajecca navat u nazvach marak i madelaŭ. Tamu hałoŭnaj metaj «Aŭta Ekspa» źjaŭlajecca pakazać nasielnictvu «novy tvar» biełaruskaha rynku novych lehkavych aŭtamabilaŭ.
Pyšnaha šou, jak heta było ŭ 2000-ch, arhanizatary nie płanujuć, ale kažuć, što budzie cikava i zvyčajnym hramadzianam, i biznes-klijentam. U prahramie šmat test-drajvaŭ, a na 4 kastryčnika zapłanavany VIP-dzień.
Kvitki ŭžo pradajucca. Košt darosłaha składaje 27 rubloŭ, dziciačaha — udvaja tańniej.
Čytajcie taksama:
Kitajskija akumulatary WeLion mohuć źmianić praviły hulni ŭ aŭtaindustryi
Ci zhnili Geely? Kolki kaštujuć i jak vyhladajuć patrymanyja biełaruska-kitajskija aŭto