U Mahilovie skaračajecca nasielnictva, ale apietyty zabudoŭščykaŭ rastuć. Pad rajon 18-paviarchovikaŭ chočuć addać terytoryju kala Bujnickaha pola
U horadzie, dzie pavodle apošniaha pierapisu źmianšajecca nasielnictva, praciahvajuć budavać hihanckija rajony sa šmatpaviarchovymi žyłymi damami. Novy taki rajon musić źjavicca na adnoj z hałoŭnych mahistralaŭ horada, vulicy Čaluskincaŭ, jakaja viadzie da miemaryjalnaha kompleksu «Bujnickaje pole».
10.08.2023 / 21:11
Miemaryjalny kompleks «Bujnickaje pole», kala jakoha chočuć uźvieści novy rajon. Fota: Jandeks Karty
Rajon «Zialony Łuh» budzie padzieleny na dva mikrarajony: pieršy budzie składacca z 6 kvartałaŭ, druhi — z 8. Prajektam praduhledžana budaŭnictva dziciačych sadkoŭ i škoły, palikliniki, abjektaŭ pieršasnaha kulturna-bytavoha absłuhoŭvańnia, miescaŭ adpačynku, sportplacovak. Na terytoryi dvuch mikrarajonaŭ płanujuć budaŭnictva 10-paviarchovych i 18 — paviarchovych damoŭ — u ich buduć žyć amal 12 tysiač čałaviek.
Vialiki novy rajon budzie pabudavany na terytoryi, jakaja, pavodle hienpłana, pryznačana pad ziamli sielhaspryznačeńnia. Heta ŭžo druhi bujny prykład parušeńnia hienieralnaha płana, raniej mahiloŭskija ŭłady damahlisia ad respublikanskaha kiraŭnictva dazvołu na zabudovu sielskahaspadarčych uhodździaŭ na ŭschod ad horada, kala žyłoha rajona «Sałominka».
Taki padychod dazvalaje dziaržaŭnym zabudoŭščykam nie zadumvacca ab pierasialeńni žycharoŭ, znosie staroj zabudovy i inšym, a atrymlivać čysty prybytak z kožnaha pradanaha mietra. Infrastruktura i sietki ŭ takim vypadku całkam kładucca na horad.
Ciapier na sajcie Mahiloŭskaha harvykankama pravodzicca hramadskaje abmierkavańnie hetaha prajekta, jakoje budzie doŭžycca da 23 žniŭnia.
Čytajcie taksama:
Na Bujnickim poli chočuć uźvieści muziej u vyhladzie savieckaha ordena
U Akolicy pad Minskam na zahad Łukašenki pačynajuć budavać katedžny pasiołak dla vajskoŭcaŭ
Minčukam prapanavali tanna pabudavacca ŭ Lachavičach. Kolki achvotnych?